Чишмәләргә бай як без

Безнең төбәктә чишмәләре булмаган авыллар юктыр ул. Саф сулы ул чиш­мә суларыннан авыз ит­кәч, бөтен ару-талулар онытыла. Янәшәбездә шул чишмәләрне чистартып, аңа өскорма эшләп куючылар да бар. Күптән түгел Олы Кайбычтагы Бөек Җиңүнең 60 еллыгы исемендәге ял паркы янындагы чишмәне әй­лән­дереп алынган рәшәт­кәдә "Хөрмәтле авыл­даш­лар! Чишмә тәнгә шифа, җанга сихәт бирә. Борынгылар әйткән: "Төкермә коега, суын үзебез эчәбез". Чишмәне карап, чистартып торыйк!", "Машиналар юу тыела", - дип язылган элмә такта пәйда булды. Әлеге тирән эчтәлекле сүзләрне сулыкларның чисталыгы өчен җан атучы кеше язуына иманым камил. Аның кемлеген торак-коммуналь хуҗалыгыннан да белешеп карадым, ләкин бу изге гамәлне башкаручыны әйтә алмадылар. Кызганыч, арада тирә-юнебезнең матурлыгы, елга-күлләрнең, кизләү­ләрнең сафлыгына битараф калучылар да бар. Әлеге фотосурәтне тө­шер­гәндә дә чишмә тирәсендә чипсы, кириешки пакетлары, төрле пластик савытлар, хәтта 50- 60 литр су сыешлы, яргаланып беткән пластмасс су багы да аунап ята иде. Бу безне, балаларны да, өлкән­нәр­не дә бизәми. Чүп-чар салу өчен махсус контейнерлар да куелган ләбаса. Табигать-Анабызны саклауга барыбыз да үз өлешебезне кертсәк иде.