«Чиста су» программасы – гамәлдә
Авылларга су кертү узган гасырның җитмешенче еллар башында башкарылган иде. Хәзер бу суүткәргечләр әле бер, әле икенче җирдән тишелеп, су белән тәэмин итүдә тоткарлык тудыра. Мәсьәләне хәл итүдә "Чиста су" программасы ярдәмгә килә.
Аның нигезендә районның кайбер авылларында суүткәргечләр алыштырылды, яңалары сузылды. Программа Салтыйган халкында да кызыксыну уяткан. Алар шушы мәсьәлә белән авылдашлары, ТР Югары Советы депутаты Рафил Ногмановка мөрәҗәгать иткәннәр. Сөйләшүдән соң боз урыныннан кузгалган. Тумышы белән Кошман егете булган Габделхак Садыйков җитәкчелегендәге "Азамат" җәмгыяте бу эшкә алынган. Салтыйганлылар Радик Камалов җитәкчелегендә биш кешене берләштергән бригада төзегәннәр. Бәхеткә, эксковаторчы, полиэтилен торбаларны эретеп ябыштыручы да үз араларында табылган. Бригада авыл буенча 3020 метр озынлыкта торба салган, 9 су колонкасы, янгын сүндерү машиналары су ала алсын өчен дүрт гидрант урнаштырган. Авыл янындагы ике чишмәне чистартып, тимер-бетон боҗралар урнаштырганнар, ике чишмәдән суүткәргеч аша су махсус савытка җыела, аннан насос ярдәмендә 50 метркуб сыйдырылышлы, Рожновский системасындагы башняга тутырыла. Хәзерге вакытта бригада чишмәләр, башня тирәләрен җыештыру, тирәсен тотып алу белән шөгыльләнә. Яңа суүткәргеч системасын 15 августта файдалануга тапшырырга ниятлиләр.
Рафил Ногмановның туган авылы өчен башкарган игелекле эшләре моның белән генә чикләнми, аның тырышлыгы белән авыл урамнарына таш юл салынган, якын киләчәктә рус урамына да түшәлер дип көтелә. Бу эшләрне Фәргать Сибгатов җитәкчелегендәге "Агрохимсервис" берләшмәсе башкара.
Следите за самым важным и интересным в Telegram-каналеТатмедиа
Нет комментариев