Әфганчылар бергә җыелды
Әфганстан җиреннән Совет гаскәрләрен чыгаруга 23 ел вакыт үтеп китте. Бу вакыт эчендә бик күп үзгәрешләр булды, хәрби хәрәкәткә карата да төрле фикерләр ишетелде. Шуңа карамастан, илебезнең күпме яшь улларының гомерен өзгән сугыш халкыбыз күңелендә төзәлмәслек яра булып саклана.
Районыбыз җитәкчеләре әлеге датаны ел саен билгеләп үтүне матур традициягә әйләндерде. 15 февральдә өч төбәктә әфганчыларны бергә җыеп, мул табын артында чираттагы очрашу үткәрделәр. Миңа "Гөбенә" агрофирмасының Мәлки филиалы ашханәсендә үткән очрашуда катнашырга туры килде.
Мәлки зонасына караган Мәлки, Иске Тәрбит, Хуҗа Хәсән, Чүти авыл җирлекләре территориясендә 17 әфганчы яши. Чит ил туфрагында гомере өзелгән Мәлки авылы егете Валерий Волков һәм Зур Тәрбиттән Владимир Драндровның әти-әниләре Анастасия, Иван Волковлар, Мария, Михаил Драндровлар өчен 15 февраль күңелдәге әрнүләр яңара торган көн. Очрашуда авыл җирлекләре башлыклары да катнашты.
Район авыл хуҗалыгы һәм азык-төлек идарәсе начальнигы Рифкать Басыйров әфганчыларга район башлыгы Җәүдәт Гаффаровның изге теләкләрен җиткерде һәм аның исеменнән бүләкләр тапшырды. Әфганчылар бер минут тынлык белән яу кырында ятып калган сугышчан дусларын искә алды.
- Интернациональ бурычларын үтәгәндә һәлак булган улларыбызны ел саен шундый очрашулар оештырып искә алуыгыз өчен олы рәхмәт. Сугыш афәтен үз җилкәләрендә татып, туган якларга әйләнеп кайткан егетләргә озын гомер, тыныч, аяз күк йөзе, гаилә бәхете, исәнлек-саулык телибез, - диде ата-аналар исеменнән чыгыш ясаган Анастасия Волкова.
Кыр Буасы авылы егете Владимир Лебедевның да теләкләре изге: сугыш уты беркайчан да кабынмасын. Очрашу Мәлки авыл клубы хезмәткәрләре чыгышы белән үрелеп барды.
Иң мөһим һәм кызыклы язмаларны Татмедиа Telegram-каналында укыгыз
