Хуҗа Хәсәннең киләчәге

Хуҗа Хәсән авылы балалар бакчасына хәзерге вакытта өч яшьтән мәк­тәпкәчә яшьтәге 24 бала йөри. Шуларның нәкъ яртысының күпбалалы гаилә­ләр­дән булуы үзе күп нәр­сә турында сөйли. Бакча мөдире Лариса Бухарова сүзләренә караганда, быел шатлыклары тагын да арткан әле. Әти-әниләр тырышлыгы һәм ярдәме белән канализация үткәргәннәр. Хәзер җылы суы кергән, агып чыгып китә - су түгеп интегәсе юк. Тәрбиячеләр беравыздан ата-аналар комитеты эшчәнлеген үрнәк итеп куя. Сабыйлар яраткан әкиятләрен карап кинәнсен, дип, DVD-уйнаткыч алып биргәннәр. Без килгәндә дә зуррак балалар белән занятиеләр алып барган арада, кечерәкләре өйрәтүле мультфильм карый иде­. 2012 елның июлен­нән тулысынча гамәлгә керәчәк федераль дәүләт таләпләре буенча эшләр­гә "Аленушка" инде әзер. Бакчадан мәктәпкә барганда бала һәрьяклап үсеш алган булырга ти­еш. Күптән түгел генә Лариса Геннадьевна махсус курсларда укып, мәктәп­кәчә тәрбиягә кертеләсе яңалыкларны өйрәнеп кайткан. Тәрбияче Раиса Бартязованың да шушы өлкәдәге педагогик стажы 23 елга җитә, югары белем ала. Нәниләрнең һәр көнен кызыклы яңалыклар белән баетырга, һәр­берсенең күңеленә якын килергә, иҗади сәләт­лә­рен үстерергә тырышалар.

- Уенчыкларыбыз бар иде, югыйсә, әмма балалар шук, тиктормас бит, кайсын ватып, кайсын сү­теп куялар, дигәндәй... Яңалары бик кирәк иде безгә. Район башкарма комитеты җитәкчесенең социаль мәсьәләләр буенча урынбасары Рами­лә Айзатуллова биш мең сумлык уенчыклар алып килгәч, сабыйлардан да артык үзем шатландым, - дип елмая бакча мөдире.