Тагын балалар утыргычлары турында

Бөтендөнья сәламәтлек саклау оешмасы мәгълүматларына караганда, балаларның махсус утыргычы юл-транспорт һәлакәтендә балаларның үлемен 54 процентка киметә. Шунысын да истә тотарга кирәк - сәгатенә 50 чакрым тизлек белән хәрәкәт итүче автотранспорт каршылыкка килеп бәрелгәндә пассажирның гәүдә авырлыгы 30 тапкыр ар­та. 10 килограмм авырлыктагы бәлә­кәч бәрелү вакытында 300 килограммга җитә һәм аны кулда тотып калу мөмкин булмый. Моннан тыш, һәлакәт вакытында сабыйлар еш кына өлкәннәрнең гәү­дәсе астында калып кысыла. Чит илләрнең күпчелегендә моңа зур игътибар бирелә. Мәсәлән, Германиядә балаларны махсус җайланмасыз утыртып йөр­гән өчен 40 евро күләмендә штрафка тарту каралган, ә Англиядә бу сумма 30 дан алып 500 фунтка кадәр булырга мөмкин. РФ Юл хәрәкәте кагыйдәләренең 22.9 пункты таләпләре буенча 12 яшькәчә балаларны транспорт чараларында махсус җайланмада гына утыртып йөртү тиеш санала. Бу таләпне үтә­мәгән очракта РФ Административ хокук бозулар Кодексының 12.23 маддәсенең беренче өлешендә 500 сум күлә­мендә штрафка тарту каралган. Шушы категориягә караган хокук бозуларны ачыклау Эчке эшләр министрлыгының ТР буенча Юл хәрәкәте иминлеге дәүләт инспекциясе өчен өстенлекле юнәлеш санала. Узган елда гына да шун­дый 75 мең закон бозу очрагы тер­кәлгән. Агымдагы елда аларның саны 10 меңнән артып киткән.