Кайбычта волейбол буенча районның II чемпионаты старт алды

- Район оешма, предприятие, учреждениеләре, авыл җирлекләренең ир-егетләр командалары арасында гы волейбол ярышларына 3 декабрьдә старт бирелде. 3-10 декабрь көннәрендә авыл җирлекләре командалары беренче тур уеннарны үткәрде инде. 15 очко белән әлегә Хуҗа Хәсән авыл җирлеге командасы алда бара. 11 декабрьдән район­ның оешмалары ир-егетләр командалары арасында көрәш башланды. Узган елдагыча, җиңүчеләр район туган көне алдыннан - 2017 елның апрелендә билгеле булачак, - диде яшьләр эшләре, физкультура һәм спорт бүлеге начальнигы Юрий Михайлов.

Волейбол ярышларында катнашуга район башкарма комитеты һәм район Советы, "Челтәрле компания", электр элемтәсе узелы, балалар һәм яшүсмерләр спорт мәктәбе тренерлары, торак-коммуналь хуҗалыгы, газ берләшмәсе, үзәк сырхауханә, полиция бүлеге, Кайбыч янгын сүндерү часте командалары заявка биргән.

Узган атнаның якшәмбесендә биредә "Челтәрле компания", сыр­хауханә, балалар һәм яшүсмерләр спорт мәктәбенең ир-егет­ләр командалары үзара көч сынашты. Ярышны энергетиклар һәм сырхауханә командалары башлап җибәрде. Ярыш шартлары буенча команда ике тапкыр җиңүгә кадәр уйнарга тиеш. Әлеге командалар очрашуы сырхауханә командасы файдасына 2:0 исәбенә төгәлләнде. Уен барышында ике команданың да көчле икәнлеге күренде. Икенче уенда сыр­хауханә командасы 27:25 исәбенә көндәшләреннән җиңүне тартып алды. Алар спорт мәктәбе командасына каршы да уйнады. Очрашу барышында ике уенда да спорт мәктәбе командасы җиңү яулады (2:0). Алдагы көннәрдә ярышта катнаш­уга заявка биргән башка командалар үзара көч сынашачак.

- Күргәнегезчә, командалар бик көчле. Шуңа күрә, финалга кадәр барып җитү өчен безгә бик нык тырышырга кирәк булачак, - диде сырхауханә командасы капитаны Василий Иванов.