Төрле ведомстволар бергә: Кайбычта «Аеклык ноктасы» проекты тормышка ашырыла

Һәр шундый очрак артында әгәр ата-аналарга вакытында кирәкле ярдәм күрсәтелсә, үз гаиләсендә үсәргә мөмкин булган балалар язмышы ята. Бүген балалар хокукларын яклауга гына түгел, ата-аналар арасындагы эчкечелекне профилактикалауга да зур игътибар бирелә. 

«Аеклык ноктасы» проекты — мондый эшнең нәтиҗәле ысулы. Ул авыр тормыш хәлендә калган гаиләләргә ярдәм итүгә юнәлтелгән. Балигъ булмаганнар эшләре һәм аларның хокукларын яклау комиссиясенең җаваплы секретаре Алсинә Кузьмина белән проектның гамәлгә ашырылуы, ирешелгән нәтиҗәләр һәм белгечләрнең нинди кыенлыклар белән очрашуы турында сөйләштек.

— Алсинә Ирековна, «Аеклык ноктасы» проектының асылы нидә һәм ни өчен ул бүген аеруча актуаль?

— «Аеклык ноктасы» проекты социаль ятимлекне профилактикалауга юнәлтелгән. Ул, беренче чиратта, авыр тормыш хәлендә калган, бигрәк тә спиртлы эчемлекләр куллану проблемасы булган гаиләләр белән эшләүне күздә тота. Аның төп максаты — баланы гаиләсендә саклап калу һәм проблеманы уңай хәл итү. Проектның актуальлеге шунда: балаларны гаиләдән аеру очракларының күбесе ата-аналарның эчкечелеге белән бәйле.

— Проект кысаларында нинди эшләр башкарыла?

— Эш комплекслы алып барыла. Бу — ата-аналарга медицина һәм психологик, социаль ярдәм күрсәтү, белгечләр тарафыннан контроль һәм патронаж. Без проблеманы теркәп кенә калмыйбыз, дәвалануга мотивация бирүдән башлап, гаиләне тулысынча туры юлга бастыруга кадәр ярдәм итү системасын төзибез.

— Проект командасына кемнәр керә?

— Проектта төрле профильдәге белгечләр катнаша: балигъ булмаганнар эшләре комиссиясе әгъзалары, социаль хезмәткәрләр, психологлар, табиблар, мәгариф оешмалары һәм опека органнары вәкилләре. Мондый ведомствоара якын килү проблеманы төрле яклап колачларга мөмкинлек бирә.

— Проектны гамәлгә ашыруның конкрет нәтиҗәләре бармы?

— Әйе, әлбәттә. Без уңай динамика күрәбез: дәвалану узган һәм аек тормыш рәвешен саклаучы ата-аналар саны арта, ата-ана хокукларыннан мәхрүм итү очраклары кими. Иң мөһиме — балалар әти-әниләре белән кала, һәм бу гаиләләр акрынлап кризистан чыга.

— Эш барышында нинди кыенлыклар белән очрашасыз?

— Төп кыенлык — кайбер ата-аналарның тормыш рәвешен үзгәртергә теләге җитеп бетмәү. Шулай ук дәваланудан соң социаль адаптация проблемалары да бар. Шуңа күрә без бер тапкыр ярдәм итү белән генә чикләнмибез, ә гаиләне озак вакыт дәвамында озата барабыз.

— Проектның киләчәген ничек бәялисез?

— Мин әлеге проектның киләчәге өметле дип саныйм. Проблеманы чишү өстендә эшләүгә караганда, профилактика нәтиҗәлерәк. «Аеклык ноктасы» моны ачык күрсәтә.

— Алсинә Ирековна, бүген авыр хәлдә булган гаиләләргә нәрсә әйтер идегез?

— Иң мөһиме — ярдәм сорарга курыкмаска кирәк. Теләк һәм ярдәм булса, проблемаларны чишәргә мөмкин. Без ярдәм итәргә, иң катлаулы хәлләрдән дә чыгу юлларын бергә табарга һәрвакыт әзер.

— Әңгәмәгез өчен рәхмәт!