Кайбыч районы укытучылары укытып кына калмыйлар

Укучылары безнең газета белән тыгыз элем­тәдә торучы түгәрәк җи­тәк­челәре дә бар иде ан­да. Бәрлебашы һәм Кошман мәктәпләреннән кочак-кочак шигырьләр килеп тө­шә безгә. Балалар иҗа­тында тормышны, туган авыл, аның кешеләре, табигатен ярату хисләре ярылып ята. Бәрлебашы мәктәбендәге "Яшь бөре­ләр" түгәрәге җитәкчесе Исламия Мусина бәйгегә "Тел күрке - сүз" дигән тема буенча әзерләнеп килгән. Бу чарада ул аларны җөмләләрне дө­рес төзергә, иҗат серләренә өйрәтте, ә соңыннан бер­гәләп Тукаебызның "Туган тел"ен башкардылар.

- Безнең түгәрәк "Кайбыч таңнары" газетасы, "Салават күпере", "Ялкын" журналлары белән тыгыз элемтәдә тора. Укучылар иҗат иткән шигырь, хикәя-язмалар басыла анда, - диде укытучы горурланып.

Кошманнан Резидә Сайранова әйтүенчә, монда "Көмеш каләм" әдәби тү­гә­рәге инде 32 елдан бир­­ле эшли. Видео­фильм­да түгәрәк эшчәнлеге ачык чагылды, түгәрәккә "Колхоз бригадасы" газетасы журналисты, соңыннан Кошман мәктәбендә укыткан Нәсимә Афзалова нигез салган икән. Язмышларын журналистика белән бәйләгән апалы-сеңелле Алия белән Лилия Мотыйгуллиналар да шушы түгәрәктә каләм тибрәткән.

Ә Иске Тәрбиттән Лиана Капитонова укучыларында лидерлык сыйфатлары тәрбияли. Аның "Ли­дерлык нигезләре" тү­гәрәгенә укучылар яратып йөри. Конкурсантлар педагогик эшчәнлекләре белән таныштырды, "Минем мәгариф программам" дигән өстәмә белем бирү программасын яклады. Нәтиҗәдә, Исламия Мусина, көндәшләреннән күбрәк балл туплап, өстә­мә белем бирү педагогларының 2015 елгы республика бәйгесенең зона этабы җиңүчесе булды. Резидә Сайранова - икен­че, Лиана Капитонова - өченче урында.