“Игътибар – балалар!” профилактик чарасы старт алды

Агымдагы елның 7 аенда республика юлларында 16 яшькә кадәрге балалар катнашында 245 юл-транспорт һәлакәте теркәлгән, аларда 7 бала һәлак булган һәм 258се тән җәрәхәте алган. Кайбыч районында балигъ булмаган балалар катнашында 3 юл-транспорт һәлакәте булган.
- Ата-аналар үз балаларының куркынычсызлыгына җитди карарга бурычлы. Балаларны, аеруча кечкенәләрне, куркыныч урыннарда, юл янында караучысыз калдырмаска кирәк. Россия Федерациясе юл хәрәкәте кагыйдәләренең 22.9 пункты нигезендә 7 яшькә кадәрге балаларны җиңел автомобильдә һәм йөк автомобиле кабинасында куркынычсызлык каешы тагып йөртергә кирәк. Җиңел автомобильнең алгы утыргычында 12 яшькә кадәрге балаларны йөртү бары тик махсус креслолар ярдәмендә генә рөхсәт ителә, - ди ЮХИДИ башлыгы Илфат Әхмәтов.