Кайбыч балалары Думасы өлкәннәргә яхшы кәеф бүләк итте

Кайбыч районының һәр мәктәбеннән берәр депутат Дума эшчәнлегендә катнаша. Алар һәрберсе яңа идеяләр белән янып яши. 3 октябрь көнне чираттагы утырыш барышында депутатлар тарафыннан өлкәннәр көне уңаеннан Федоровское авылындагы картлар һәм инвалидлар интернат-йортына концерт программасы белән барып чыгыш ясау тәкъдиме кертелгән иде. Әзерлек мәсьәләләрен үзара бүлешеп, уртага салып сөйләшү булды. Балалар Думасы депутатлары өлкәннәр йортында тәрбияләнүче әби-бабайларыбыз, абый-апаларыбызга карата аерым мөгамәлә кирәклеген аңлый.

Интернат-йорт директоры Альбина Миңнуллина безне күптәнге танышлары кебек каршы алды. Өлкәннәр матур итеп, бәйрәмчә киенеп, кунакларны залда түземсезлек белән көтәләр иде. Концерт барышында әби-бабайларның күзләрендә яшь бөртекләре күренсә дә, шатлыктан балкыган йөзләре күнелләребезгә тынычлык бирде. Чыгышларыбызны җылы алкышлар белән кабул итте алар. Концерттан соң истәлеккә үзләре белән фотосурәткә төшүебезне үтенделәр. Хәер-фатихаларын биреп , киләчәктә тагын очрашулар теләп, озатып калдылар. Шат күңелле депутатлар юлда кайтканда моңсуланып калганнар иде. Өйләрендә үзләренең якыннары бар бит, интернат-йортта гыйбрәтле язмышлар бик күп иде шул.