Зур Подберезье мәктәбе укучылары: “Безнең укытучылар репетиторлардан мең тапкыр яхшырак”

Рус теленнән иң югары баллар Зур Подберезье мәктәбе укучылары Светлана Расперетихина бе­лән Алинә Фәйзрахмановада. Кызларның икесе дә 95әр балл җыйган. Классташлары Светлана Севастьянова - 90, Виктория Турова 87 баллга ия. Ә Алла Каретина тарихны 89, рус телен 79 баллга тапшырган. Бу мәктәптән ел саен әнә шулай берничә укучы имтиханнан бик югары баллар ала. Бердәм дәүләт имтиханнарын уңышлы тапшырган укучылар бе­лән танышу өчен әлеге мәктәпкә юл тоттым.

- Кызлар, сезгә йөз балл­га ирешергә бераз гына калган. Нинди хата җи­бәр­гәнегезне соңыннан аң­ладыгызмы соң? - дип сорыйм Светлана белән Алинәдән.

- Минем биремнәрнең "А" өлешендә бер хатам булган, - диде Света. - Дө­ресен генә әйткәндә, мин бу кадәр югары күрсәт­кеч­кә өметләнмәгән дә идем. 60-70 балл җыя алсам, яхшы булыр иде, дип уйладым. Ә укытучыбыз Ксения Елисеева безнең белемебезгә, имтиханны яхшы тапшырачыгыбызга ышанды.

- Ә минем балл иншада тыныш билгесен дөрес куймау сәбәпле кимегән, - ди Алинә.

- Безне иң гаҗәпләндергәне шул булды: югары балл алуыбызны ишет­кән һәр кеше, әлбәттә укытучылардан кала, ничек күчерә алдыгыз, әзер җавапларыгыз бар идеме әллә? - дип сорый. Бу кәефебезне төшерде. Ник шунда берсе, булдырдыгыз кызлар, сез мо­­ңа лаек, мәктәптә яхшы укыдыгыз бит дисен, - дип сүзгә кушылды Алла Каретина.

- Репетиторга йөрдегезме соң, күпме акча түлә­дегез? - дигән соравым аларны бөтенләй аптырашта калдырды.

- Безнең укытучылар репетиторлардан мең тапкыр яхшырак! Консульта­ция­ләрдән тыш мөрәҗә­гать итсәк, барыбыз бе­лән дә шөгыльләнделәр. Һәрбер консультация ке­че бер­дәм дәүләт имтиханы кебек уза иде. Уңышларыбыз - укытучыларыбыз тырышлыгы нәтиҗәсе дә әле ул.

Кызлар фикеренчә, бер­дәм дәүләт имтиханы ки­рәк, әмма аны тапшыру системасын тамырдан үз­гәртү мөһим.

- Дагыстанда укучыларның имтиханда ничек кү­черүләрен бөтен Россия­гә күрсәттеләр. Андый төбәкләр бер Дагыстан белән генә чикләнми бит. Владивосток укучылары әзер җавапларны интернетка урнаштырган дип шауладылар. Кемдер унбер ел буена көч-хәл белән укып чыга да, имтиханда, булышучылары булгач, 80-100 балл җыя. Ә син гел бишкә укып, үз белемең белән имтихан тапшырасың, баллың өч­ле капчыгыныкы кебек булырга мөмкин. Көн кебек ачык, алар югары уку йортларында бюджет урыннарына керә дә утыра. Кая монда дөреслек? - диләр алар.

Мәктәп директоры Фән­зилә Биктимерова кызларның, шул исәптән 16 чыгарылыш укучысының имтиханнарны үз көчлә­ре белән тапшыруына ышана.

- Бу кызларның барысы да уку алдынгылары. Кайсы ударник, кайсы отличник. Алинә мәктәпне кө­меш, ә Алла алтын медальгә тәмамларга җые­на. Алинәнең апасы Лилия дә мәктәбебезне алтын медальгә тәмамлаган иде. Бездән ел саен медалистлар чыга. Укучыларыбыз барысы да алган билгеләрен югары уку йортларында аклый. Без укучыларны бердәм дәү­ләт имтиханнарына 5нче класстан башлап бөтен коллективыбыз белән әзерли башлыйбыз. Мә­сә­лән, унберләрне рус теленән Ксения Геннадьевна укыт­­ты, ә имтиханга ул гына түгел, ә бөтен рус теле укытучылары хәзерләде. Башка фәннәрдән дә укытучылар бер-берсенә булыша. Шулай бер­дәм булганда гына нәтиҗәлелеккә ирешергә мөм­кин.

Укучыларны бишенче класстан тугызынчыга ка­дәр укыткан югары категорияле укытучы, 45 ел буена балаларны Пушкин теленә төшендерүче Екатерина Елисеева да, тугызынчыдан кабул итеп алган Ксения Елисеева да алар белән горурлана.