Казан пьедесталенда – Кайбыч көрәшчеләре

Әлеге турнирда Казан шә­һәре һәм Питрәч районы көрәшчеләре белән беррәттән районыбызның яшь спортчылары да катнашты. Кайбыч районы җыелма командасы составында Мәлки, Олы Кайбыч, Кече Кайбыч, Кошман, Мөрәле, Кече Мәме авыллары егетләре чыгыш ясады. Өметле кө­рәшчеләр районның башка авылларында да бар, ләкин аларның барысын да әлеге турнирга алып бару мөмкин булмады. Шунысы куаныч, турнир җиңүчеләре һәм призерлары арасында безнең алты якташыбыз да бар. Үз үлчәү авырлыкларында Кошманнан Шәфкать Фәйзуллин, Мәлкидән Антон Галкин, Олы Кайбычтан Марсель Сәйфуллин чемпион булып калды. Шунысын да әйтергә ки­рәк, 55 килограммга ка­дәр­ге үлчәү авырлыгында, 1996-1998 елгы егет­ләр арасында пьедесталның барлык баскычларына безнең көрәшчеләр күтәрелде: беренче урын­ны Марсель Сәйфуллин яуласа, икенче-өченче урыннарны Мәлкидән Константин Лутцев белән Олы Кайбыч егете Булат Шакиров бүлеште. Безнең тагын бер көрәшчебез, Кече Кайбычтан Илнур Хикмәтуллин дүртенче урынга чыкты. Үз үл­чәү категорияләрендә Кошманнан Нәфкать Фәй­зуллин һәм Ренат Гатиятуллин, Кече Кайбычтан Данис Абдулхәеров һәм Мәлкидән Василий Воробьев дүртенче урынны яулады.

Турнирда Мөрәле авылыннан Булат Сибгатовның чыгышын аерым бил­­геләп үтәсе килә, яшь булуына карамастан, 30 килограммга кадәр үлчәү авырлыгында (2001 ел­гы) техник яктан яхшы кө­рәш алымнары күрсә­теп, лаеклы рәвештә өченче урынны яулады. Призлы урыннарны яу­лаган барлык көрәшче­ләр дә Мактау кәгазьләре, медаль­ләр, кыйммәтле бүләкләр белән бүләк­лән­де. Үзлә­ренең уңышлы чыгышлары белән Кайбычның яшь көрәшчеләре Казан һәм Питрәч­тән килгән яшьтәшләреннән берни белән дә аерылмауларын күрсәт­теләр. Оештыручылар һәм хөкемдарлар арасында спортның бу төре буенча спорт мастерлары, республиканың атказанган тренеры Николай Крылов һәм Кайбыч Сабан туйларында озак еллар бил алышкан Марсель Хәйдәров та бар иде. Алар да безнең спортчыларның турнирдагы чыгышларын югары бәяләделәр һәм алдагы ярышларда уңышлар теләделәр. Әле­ге турнирдагы уңышлы чы­гыш якташларыбызга үз көчләренә ныграк ышанып, республика күләмендәге ярышларда яхшырак нәтиҗә­ләргә ирешергә этәргеч булыр дип уйлыйм.