Хокукларыңны яклый бел
15 ноябрь көнне кулланучыларны борчыган барлык сорауларга ТР Дәүләт алкоголь инспекциясе җитәкчесе Игорь Марченко видео-элемтә режимында җавап бирде.
Гражданнарны кабул итү ТР Дәүләт алкоголь инспекциясенең Яшел Үзәндәге җирле органы начальнигы Марина Тихонова белән координация һәм эчке базар үсеше бүлеге начальнигы Флера Гаязетдинова катнашында узды. Контроль-инспекция бүлегенең әйдәүче белгеч-эксперты Ирина Орлова әйтүенчә, гражданнар турыдан-туры җитәкчелеккә мөрәҗәгать итә алырдай мондый очрашулар кулланучыларга хокукларын белергә һәм якларга ярдәм итә. Мисал өчен, күпләр әле хәзер дә аптекадан сатып алынган товарны кире кайтарып яки алмаштырып булмавын белми икән. Мөрәҗәгать итүче бер туташ кебек аптекадан кара тонометр сатып алып, соңрак аны башка төстәгесенә алмаштырырга телисез икән, аптека хезмәткәрләре сезнең үтенечне канәгатьләндермәячәк. "Кулланучылар хокуклары турында"гы РФ законының 25 маддәсендә әйтелгәнчә, алмаштырып алу хокукы барлык товарларга да каралмаган, шул исәптән, медицина приборлары өчен дә.
Әгәр инде гарантия вакыты чыкканчы ук суыту камерасы яки суыткычыгыз ватылса, шуны белеп торырга кирәк: зур габаритлы яки массасы биш килограммнан да күбрәк булган товарны ремонтка бирү, алмаштыру яки кире кайтару чыгымнарын сатучы капларга тиеш. Кулланучы товарны үзе китереп биргән икән, чыгымнарны сатучыдан каплатырга хокуклы.
Күп кенә шәхси эшмәкәрләрне алкоголь продукциясен сату кагыйдәләре кызыксындыра. Игорь Марченкога сорау бирергә килүче бер шәхси эшмәкәр кибетенең бер өлешен алкоголь сату өчен арендага бирергә ниятләгән. Кибетнең гомуми мәйданы 24 квадрат метр тәшкил итә. Дәүләт алкоголь инспекциясе җитәкчесе аңлатмасына караганда, 2012 елның 1 июленнән гамәлгә керәчәк Федераль Закон нигезендә алкоголь продукциясен ваклап сату өчен гомуми мәйдан 25 квадрат метрдан да кимрәк булмаска тиеш. 2012 елның июленнән сыра һәм аның нигезендә ясалган башка эчемлекләр дә алкоголь продукциясе категориясенә кертеләчәк. Этил спирты әзер продукт күләменең биш һәм аннан да азрак процентын тәшкил иткән сыраны сату вакыты буенча 2013 елның 1 гыйнварына кадәр чикләүләр булмаячак. Этил спирты биш проценттан артыграк булган сырага чикләүләр 2012 елның июленнән үк башлана. Киләсе елның 1 гыйнварыннан сыраны ваклап сату белән шөгыльләнүче шәхси эшмәкәрләргә, градусы кипме булуга карамастан, сату күләменә декларация кертеләчәк. Республикада бу эшне ТР Дәүләт алкоголь инспекциясе башкарачак.
Следите за самым важным и интересным в Telegram-каналеТатмедиа
Нет комментариев