Сез “Табуретка” фестивале турында ишеттегезме?

"Табуретка" балалар театр-шигъри иҗат фестивалендә катнашу өчен төрле юнәлештә эшләүче балалар һәм үсмерләр театр коллективлары (музыкаль, драма, курчак һәм башка) чакырыла. Анда 17 яшькә кадәрге балалар катнаша ала. Фестивальдә катнашу - бушлай. Сайлап алу турына гаризалар 2013 елның 1 мартыннын 31 маена кадәр кабул ителә.

"Әкият" курчак театры җитәкчесе Венера Сафиуллинадан әлеге фестиваль турында ниләр белүе белән кызыксындым.

- Дөресен әйткәндә, бу хакта әле беренче тапкыр гына ишетәм. Ләкин безнең мондый фестивальләрдә катнашу тәҗрибәбез бар. 2008 елда Владимир- Суздаль шәһәрендә безнең коллектив талантлы балалар һәм үсмерләр өчен үткәрелгән "Алтын балдак" Халыкара фестиваль- бәйгедә катнашты һәм икенче дәрәҗәдәге лауреат исеме алып кайт­ты. "ЭКО" мәктәптән тыш эшләр үзәге каршында Чүти урта мәктәбенең "Тамчылар" курчак театры, Бәрлебашы төп мәктәбенең "Яшь талантлар" балалар театры коллективлары эшли. "Табуретка" балалар театр- шигъри иҗат фестивалендә катнашучылар табылыр, дип уйлыйм, - диде үзәк директоры.

Гаризаларны җибәрергә соңга калмаска кирәк. 2013 елның 1 мартыннын 31 августына кадәр сайлап алу туры үтә. Финал 2013 елның 20 - 22 сентябрьләрендә Санкт - Петербург шәһәрендә уза. Фестивальнең эчтәлеге һәм тәртибе, формасы һәм гаризалар регламенты турында газета сайтыннан белә аласыз: www.kaibicy.ru.