Яшьләргә патриотик тәрбия

Анда ТР хәрби комиссары, генерал-майор Сергей Погодин, ТР яшьләр эшләре, физкультура, спорт һәм туризм министры урынбасары Рөстәм Гарифуллин катнашты. ТР хәрби комиссары әй­түенчә, яшьләргә хәрби- патриотик тәрбия бирүне мәктәптән үк башларга кирәк. Татарстандагы 1272 белем бирү учреждениесенең барысында да узган уку елында хәр­би хезмәт нигезләре буенча әзерлек үткә­рел­гән. Республикада кадетлык белеме бирү киң җәелгән. Тәрбиягә авыр бирүче торган балалар, ятимнәр һәм социаль яктан тотрыклы булмаган гаи­лә­ләрдә тәрбияләнүче балаларны җәлеп иткән кадет мәктәпләре, мәктәп- интернатлар, классларны берләштергән тулы бер челтәр эшли. Узган ел 8 меңгә якын малай һәм кыз кадет класс тәмамлаган. Үткән конференцияләрнең берсендә ТР Премьер-министры урынбасары Равил Моратов Татарстандагы балалар йортлары базасында кадет мәктәпләре оештырылачагын әйткән иде. Беренчеләрдән булып, шундый мәктәп Яшел Үзән районында оештырыла. "Гомумән, яшь­ләр үз иленең тарихын, халкының данлы юлын белергә, үзенең Ватанга кирәклеген аң­ларга тиеш. Без яшьләрне ничек тәрбияләсәк, аларның илебезгә мөнә­сәбәте шундый булачак", - ди Сергей Погодин.

Ул егетләрне Россия Кораллы Көчләре сафларына чакыру мәсьәләсенә дә тукталды. Быелгы язгы чакырылышта Татарстаннан 4,5 меңләп егетне хәр­би хезмәткә озату планлаштырыла. "Алга таба егетләрне Татарстан белән шефлык элем­­тәләре урнаштырган частьләргә озатачакбыз. Хәзерге вакытта аларның саны 65 кә җитте. Узган ел өч меңнән артык егетне шул частьләргә җибәрдек", - диде хәрби комиссар.