Федоровскоеның мөхтәрәм кешесе Александра Филинага 90 яшь тулды

Бу көнне Александра Егоровнага сәламәтлек, иминлек һәм күңел тынычлыгы теләп, аның адресына бик күп җылы сүзләр яңгырады. Моннан тыш, Рәмис Хәялиев күңелле миссияне дә үтәде - Россия Федерациясе Президенты Владимир Путин һәм район башлыгы Альберт Рәхмәтуллин исеменнән котлау открыткаларын һәм истәлекле бүләк тапшырды.

- Якыннарыгыз сезне һәрвакыт ихтирам итеп, кайгыртып торсын. Кәефегез гел күтәренке булсын, һәр яңа көн сезгә бары тик шатлыклы хәбәрләр генә алып килсен, - дип теләде ул.

Котлаулардан соң, юбилярның тормыш юлы белән кызыксындым.

- Мин күрше Яшел Үзән районының Рус Әҗәле авылында туып-үстем. Бөек Ватан сугышы башланганда миңа ундүрт яшь иде. Ирләр фронтка китте, авылда олы яшьтәге кешеләр һәм балалар гына калды, - дип искә алды Александра Филина. - Сугыш елларын эшләп уздырдык, көндез дә, төнлә дә хезмәттә булдык. Мин гомерем буе фермада эшләдем. Тормыш иптәшем Геннадий Вячеславович белән өч бала - Виктор, Татьяна һәм Владимирны тәрбияләп үстердек. Кызганыч, ирем дә, кечкенә улым да күптән мәрхүм булдылар.

Хезмәт һәрвакыт авылның нигезе, яшәү рәвеше булган. Александра Егоровна колхозда бозау караучы булып эшләгән, "Хезмәт ветераны" исеменә лаек булган. Бүгенге көндә ул берүзе яши, ләкин үзен ялгыз хис итми. Олы улы Виктор гаиләсе белән Федоровскоеда гомер кичерә. Бәйрәм көнне аның килене Клара мул итеп табын әзерләгән иде. Онык-оныкчыклар да Александа Филина янына еш килә. Әнә, юбилее белән котлап, оныкчыклары Валерия белән Артем аның өен шарлар белән бизәгән, бүләккә чәчәкләр җыеп килгән. «Әбекәй, без сине яратабыз!» - ди алар. Юбилярның кызы Татьяна Новгород өлкәсенең Валдай шәһәрендә яши. Соңгы тапкыр туган авылына Яңа елга кайткан булган. Әнисен юбилее белән телефон аша гына котлаган, аралар ерак шул.

- Туксанга җиткәнемне сизми дә калдым. Әйтерсең лә гомер күз ачып йомган арада узды да китте. Шунысы куандыра: ул заяга үтмәде, - диде Александра Егоровна, үзенә күрсәткән игътибар һәм ихтирам, җылы сүзләр өчен рәхмәт әйтеп.