Кадерле һәм изге бәйрәм

Дамир Шәрәфетдинов, шәхси эшмәкәр, Чүти:

— Районыбызда яшәүче мөселман динендә булган һәркемне Корбан бәйрәме белән тәбрик итәм. Корбан гаете, ислам динендәге башка бәйрәмнәр кебек үк, күркәм эшләр кылуны, рухи чисталыкка ирешүне һәм гөнаһларыбызны ярлыкауны гәүдәләндерә. Әлеге бәйрәм бигрәк тә авыруларга, бәла-казага юлыккан мөселман кардәшләребезгә, олы буын вәкилләренә, ятимнәр һәм мохтаҗларга битараф калмаска, аларга игътибар күрсәтергә чакыра.
Дини бәйрәмнәребез дә районыбыздагы төрле милләт вәкилләре арасында гасырлар буена килгән дуслыкның ныклыгын, өлкәннәргә, мохтаҗларга карата ихтирамыбызның күңелләрдә саклануын ачык дәлилли. Һәрбарчабызга да күңел тынычлыгы, иман байлыгы, озын гомерләр насыйп булсын.