Кайбыч районы башлыгы Россия Кораллы Көчләре сафларында хезмәт итеп кайткан егетләр белән очрашты

Бер солдат, контракт төзеп, алга таба хезмәт итәргә калган. Традиция буенча, район башлыгы Альберт Рәхмәтуллин Ватан алдындагы изге бурычын үтәп кайткан солдатлар белән очрашты. 

Әле кайчан гына озатканнар иде кебек үзләрен, бер ел узып та киткән икән. Очрашуга килгән егетләрне — Олы Кайбычтан Рамил Сергеев, Нияз Гарәфетдинов, Морза Бәрлебашыннан Альмир Борһанов, Инсаф Борһанов, Олы Тәрбиттән Раил Гыйбадиев, Чүтидән Рафил Хөснетдинов, Олы Урсактан Айнур Җәләлиевны районның хәрби исәпкә алу өстәле начальнигы Сәвия Зиннурова сөенеп каршы алды. Әниләрчә кайгыртучанлык күрсәтеп, хәл-әхвәлләрен сорашты. Район башлыгы Альберт Рәхмәтуллин, намуслы хезмәт итүләре өчен рәхмәтен белдереп, егетләргә Кайбычның 30 еллыгы медальләрен тапшырды. 

— Армиягә киткәндә яшүсмер егетләр идегез. Районыбыз данына тап төшермичә хезмәт итеп, кыю ир-атларга әйләнеп кайттыгыз, — диде Альберт Илгизәрович. — Хәзерге вакытта күбегез ял итәдер. Алга таба нишләргә, кая барырга икән, дип баш ватучылар да бардыр. Туып-үскән районыгызда калырга уйласагыз, без шат кына булырбыз. Бездә эш урыннары җитәрлек. 

Очрашуга полиция бүлеге начальнигы Альберт Шакиров һәм аның урынбасары Илшат Сираҗетдинов та килгән иде. Алар егетләрне үзләренә хезмәткә чакырды, шушы өлкәләрдә эшләүнең өстенлекле яклары турында сөйләделәр.