Кайбычның сигез укучысына тантаналы төстә паспорт тапшырдылар

Тантананы музей хезмәткәре Зөлфия Галиуллина алып барды, анда яшүсмерләрнең әти-әниләре, яшьләр сәясәте, физкультура һәм спорт секторы мөдире Альбина Әхмәтова һәм «Алдынгылар хәрәкәте» Бөтенроссия балалар һәм яшьләр хәрәкәтенең җирле бүлеге җитәкчесе Елена Краснова да катнашты.

Россия Федерациясе гражданинының төп документын Олы Кайбычтан Булат Гарәфетдинов, Ринат Хәйретдинов, Борындыктан Резедә Гарәфиева, Бәлидән Валерия Яшина, Олы Тәрбиттән Богдан Волков, Олы Подберезьедан Ульяна Волкова, Ксения Харьчева, Олы Урсактан Динар Вәлиев алды.

Укучыларны район башлыгы Альберт Рәхмәтуллин кайнар котлады, аларның илебезнең лаеклы гражданнары булуларын теләде.
Ул паспортларны Россия Эчке эшләр министрлыгының Кайбычтагы миграция бүлеге начальнигы Илфир Яруллин белән берлектә тапшырды.
Паспорт тарихы турындагы видеороликны укучылар кызыксынып карады. Соңыннан алар өчен музей буйлап экскурсия оештырылды.