Кайбыч игенчеләре уракка чыкты

 Уракка төшәр алдыннан Татарстан Авыл хуҗалыгы һәм азык- төлек министрлыгы боерыгы белән бөртеклеләрне урып- җыю техникасының әзерлеге буенча бәйге оештырыла. Районыбызда комбайннар әзерлеген тикшерү буенча махсус комиссия бүген урыннарда булып, комбайнчылар белән очрашулар үткәрде. 
“Татагрохим” ачык акционерлык җәмгыяте генераль директоры Наил Гобәйдуллин рәислегендәге комиссия үз эшен “Яңа юл” хуҗалыгыннан башлады. Аннан кала, “Дубрава” җәмгыятенең өч филиалында, “Подберезье” хуҗалыгында булдылар. Быел көннәр кызу, коры һава сакланганлыктан, күпчелек урыннарда алдагы көндә, бүген комбайннар кырга чыкты инде. Шул сәбәпле, комбайннарны да басуда гына карадылар. Нәтиҗәдә, 50 мөмкинлектән 49 балл туплап, “Дубрава” җәмгыятенең өченче филиалы беренче урынга чыкты. Беренче, икенче филиаллар 48әр балл белән икенче урында. 47 балл туплаган “Яңа юл” хуҗалыгы өченче урында. Район буенча уртача балл 47 гә туры килә. Бу хакта тулырак газетаның киләсе саныннан укый аласыз.