Кайбычлылар цифрлы телевидениедән Татарстан каналын да карый ала

Тәтеш шәһәрендәге ретр ансляторының сигнал трансляциясе, челтәр сыйфаты өчен җаваплы хезмәткәрләре хәбәр иткәнчә, цифрлы телевидениене кабул итүгә әзерлек эшләре дәвам итә.
– Безнең төп максатыбыз – районда цифрлы телевидениегә күчүне проблемаларсыз оештыру. Цифрлы телевидение күрсәтмәсә, бу хакта халык белән элемтәдә торуда җаваплы кеше –авыл җирлеге башлыгына җиткерергә кирәк, алар моны тиешле урыннарга хәбәр итәчәк, – диде әлеге мәсьәләне үз контролендә тотучы район башлыгы урынбасары Рәмис Хәялиев. – Цифрлы телевидениегә күчүчеләр Татарстан каналларын карый алмауларына борчылмасын иде. ТНВ тапшыруларын тугызынчы каналдан (Общественное российское телевидение) карап була, ул иртән һәм кич белән өчәр сәгать күрсәтә. Хәзерге вакытта документларга бәйле мәсьәләләрне хәл итү ахырына якынлашып килә. Бу хакта Татарстан Радиотелевизион тапшырулар үзәгенең Тәтештәге филиалының цех начальнигы Венера Мустаева да хәбәр итте.
Кайбычлыларның Татарстан телевиденисен караудан мәхрүм калулары турындагы борчылулары, димәк, урынсыз. Әлеге мәсьәлә Татарстан халкы файдасына хәл ителгән.