Кайбычта “Язгы каникуллар” оператив- профилактик чарасы үткәрелә

Каникулларны укучылар һәрвакыт сагынып көтеп ала. Язгы кояш нурларын мул сибә, буш вакыт күп, рәхәтләнеп урамда уйнарга була. Ял вакытында күңелсез хәлләр булмасын өчен, балалар мәктәптә укытучы апалары өйрәткән иминлек чараларын да төгәл үтәргә тиешләр. Транспорт йөрүче юлларда аеруча сак булырга кирәк.
Юл аша чыкканда, музыка тыңлап, кәрәзле телефоннан дусларыгыз белән сөйләшеп, игътибарыгызны читкә юнәлтмәгез.Киемгә һәм сумкагызга яктылыкны кире кайтара торган элемент беркетергә онытмагыз. Караңгыда шоферлар сезне тиз күреп алачак. Машинада барганда куркынычсызлык каешларын эләктерергә онытмагыз. Бу кагыйдәләрне төгәл үтәү тормышыгызны һәм сәламәтлегегезне саклап калырга ярдәм итәчәк.