Кайбычлылар “ЭкоЯЗ” бәйгесендә катнаша ала

Санитар-экологик икеайлык үткәрү буенча игълан ителгән "ЭкоЯЗ" бәйгесенең максаты - Татарстан Республикасында экологик культура булдыру, халыкта әйләнә-тирә мохиткә карата сак караш тәрбияләү. Бәйге "Эко мәктәп", "Эко вуз", "Эко гаилә", "Эко предприятие" номинация­ләрендә үткәрелә. Аның кысаларында тирә-юньне санитар чистарту, флэшмоблар үткәрү, агачлар утырту, сыерчык оялары ясау, экологик дәресләр уздыру, табигатькә багышланган шигырьләр, җырлар иҗат итү, шимбә өмәләре вакытында фото, видео төшерү һәм аны социаль челтәргә урнаштыру күздә тотыла. 1 апрельдән 15 майга кадәр үткәрелүче бәйгедә теләгән һәр кеше катнаша ала. Материалларны Кайбыч муниципаль районының административ комиссиясе секретаре Ләйсән Басыйровага Leysan.Basyrova@tatar.ru​ адресына җибәрергә кирәк. Конкурс комиссиясе әгъзалары бәйгегә йомгакны агымдагы елның 20 маена кадәр ясый. Җиңүчеләр турындагы мәгълүматлар һәм аларның заявкалары Татарстан Республикасы Экология һәм табигый ресурслар министрлыгына җибәрелә. Җиңүчеләрне дипломнар, кубок һәм призлар көтә, кызыксындыру бүләкләре дә каралган.