Кайбычлылар Казанда үтәчәк ата-аналар форумында катнашачак

Республика күләмендә узучы әлеге чараны Россия Федерациясе Ата-аналар милли ассоциациясе, Татарстан Мәгариф һәм фән министрлыгы, ТР Дәүләт Советының «Мәрхәмәт» хатын-кыз депутатлар берләшмәсе һәм Татарстандагы Әтиләр советы оештыра. Анда безнең районнан мәгариф бүлеге начальнигының тәрбия эшләре буенча урынбасары Рамил Зиннәтуллин, районда Әтиләр советы җитәкчесе Айрат Хәсәнов һәм биш ата-ана катнашачак. Форумда гаилә традицияләре, укучыларның үз-үзләрен тотышы, дөрес туклануы, хезмәт тәрбиясе бирү, мөмкинлекләре чикле булган балалар тәрбияләү, интернет куркынычсызлыгы буенча мастер-класслар да уздырыла. Рамил Сәлимович әйтеп узганча, форумга әзерлек кысаларында Мәгариф һәм фән министрлыгы сораулар да кабул итә. Бала тәрбияләүгә кагылышлы барлык сорауларны алдан http://mon.tatarstan.ru/rus/roditeli.htm адресына юлларга мөмкин.