Кече Мәме мәктәбе укытучысы “ТАТМЕДИА” акционерлык җәмгыяте призына лаек булды

2018 елның беренче яртыеллыгына газета-журналларга язылу йомгаклары буенча игълан ителгән чираттагы бәйгедә кызыксындыру бүләгенә  Имәнле Бортас авылында яшәүче Земфира Насыйбуллина лаек булды. Ул Кече Мәме төп мәктәбендә татар теле һәм әдәбияты укытучысы булып эшли. Шунысын да әйтергә кирәк, бу бәйгедә яшь буынга белем һәм тәрбия бирүче укытучылар актив катнаша һәм бүләкләнә дә.
– Безнең буын газета -журналлар укып үсте. Шул сәбәпледер инде, газетага язылуны тормышның аерылгысыз бер өлеше итеп кабул итәбез. Хәзерге заманда мәгълүмат чыганак­лары бихисап, интернет челтәрендә бар яңалыкны да табып була, диярсез. Әмма кәгазьгә басылган сүз аңлаешлы да, ышанычлы да яңгырый. Яңа килгән, укылмаган газета-журналлар эшләнмәгән эш кебек көтеп тора сыман, – диде Земфира Насыйбуллина, кулына «ТАТМЕДИА» бүләкләрен алгач. – Мәктәптән кайтуга, газеталардагы яңалыклар белән танышып чыгам. Бу минем өчен рухи азык та, ял да. Мәктәптә эшләгәнгә, “Мәгариф”, “Гаилә һәм мәктәп” журналлары минем эшемдә дә зур ярдәмче булып тора. “Кайбыч таңнары” газетасы – һәрвакыт өебезнең көтелгән кунагы. Ул барыбызның да кулыннан уза. Районыбызның тормышы белән ничек кызыксынмыйсың инде? Яңа газеталарны мин генә түгел, гаиләм дә яратып укый. Кызым бигрәк тә “Салават күпере” журналын көтеп ала. Ул андагы төрле бәйгеләрдә дә катнаша. “ТАТМЕДИА” акционерлык җәмгыяте тарафыннан уздырылган бәйгедә быел мин дә катнашырга булдым. Төп бүләкне отып булмаса да, кызыксындыру бүләге дә минем өчен көтелмәгән зур сөенеч булды. Мине эш урыныма килеп зурлап котладылар һәм бүләк тапшырдылар. Бүләк-пакет эченнән журналлар, сумка һәм кулчатыр килеп чыкты. Чәчәкле кулчатыры, тиздән яз киләсен хәбәр иткәндәй, кәефне күтәреп җибәрде. Газета укучыларга дә әйтәсем килә: «Кайбыч таңнары»на язылыгыз, укыгыз, төрле бәйгеләрдә катнашыгыз. Тормышның күңеллелеге үзебездән тора. Бер-беребезнең хәлен белеп, ярдәмләшеп, күңелле итеп яшик.