Надеждино авылында яшәүче Бурлаковлар күп итеп тавык-чебеш һәм мал-туар асрый

Надежда һәм Александр Бурлаковлар тормыш ямен тоеп яши.  Һәрьяктан да уңган алар. Кош-корт кына түгел, терлекләрне дә күпләп асрыйлар икән. Унике баш мөгезле эре терлекләренең  дүртесе савым сыеры, өчесе буаз тана, калганнары үгезләр, бозаулар. Сарыклары, дуңгызлары да бар. 
– Авылда яшәгәч, терлек асрамыйча булмый инде. Сөтнең бер өлешен үзебезгә калдырабыз, калганын дәүләткә тапшырабыз. Аена 800-1000 килограмм сөт сатудан кергән акча гаиләбезгә өстәмә керем чыганагы ул. Табыннан сөт, каймак, эремчек, итнең өзелеп торганы юк. Ни дисәң дә, экологик яктан чиста, үзең җитештергән продукция. Кош-кортларның төгәл исәбен дә белмим, алар күп. Җәй дәвамында индоуткалар ике-өч тапкыр  бала чыгара, – диде Надежда Александровна. –Терлекләргә азыкны ничек җиткерәбезме? Безнең якларда табигый болыннар күп, иренмәгән кешегә печәнне мулдан хәзерләргә була. Фураж, печәнне агрофирмадан пай җирләре өчен бирәләр. Катнашазык­ны Чувашиянең Канаш шәһәреннән дә сатып алып кайтабыз. 
Надежда – “Дубрава” җәмгыятенең икенче филиа­лы­ ашханәсе пешекчесе.Волжск шәһәрендә туып-үскән. Әти-әнисе Салтыйган авылыннан, җәйге каникуллары гел шунда узган. Шуңа да авыл тормышы таныш аңа.Тормыш иптәше Александр – механизатор. 
Әңгәмәбезгә Александр Владимирович үзе дә кушылды.
– Урта белемне Ульянково мәктәбендә алдым. Без укыган елларда трактор буенча да дәресләр керә иде, шуңа да мәктәпне тәмамлаганда ук тракторчы-машинист таныклыгы алып чыктык. Укуны бетерүгә колхозда механизатор булып эшли башладым. Еллар дәвамында тәҗрибә туплаган саен икенче, соңрак беренче класска имтихан тапшыр­дым. Хәзер мин беренче класслы механизатор, “Ягуар” комбайнында эшлим, – диде ул. – Авылда яшәп, терлек асрамыйча булмый. Кечкенә чагыбыз­дан әти-әни­ләр белән бергә абзарда кайнашып үскән малайлар бит без. Балачактан бирелгән хезмәт тәрбияседер инде, ишегалдын терлексез күз алдына да китерә алмыйм. “Т-40” тракторым, печән чапкыч, печән җыярга тырма, аны алып кайтырга арбам бар.  Киләчәктә печәнне рулонга төрү агрегаты да алырга уйлыйм. Хатыннан да уңдым, шәһәр кызы булса да,  терлекләр янында кайнаш­ыр­­га­ ярата. 
Бурлаковларның гаилә учагына 1994 елда нигез салынган. Ике бала тәрбия­ләп үстергәннәр. Кызлары Наталия хәзерге вакытта үз гаиләсе белән Волжск шәһәрендә яши. Уллары Антон Казанда юридик белем ала. Төп нигезгә кайтуга, үзләренә шөгыль табалар. әти-­әниләренең уңган булуларына чиксез горурланалар.