Ренат МОТЫЙГУЛЛИН, «Алтын кырлар» җәмгыяте директоры: “Кайбыч уңганнарына дан”

Сезне чын күңелемнән татар халкының иң кадерле, күңелле бәйрәмнәренең берсе – Сабантуе белән котлыйм. Кайбычта хезмәт сөючән, киң күңелле, кунакчыл кешеләр яши. Бу бәйрәмне җәмгыятебез хезмәтчәннәре күтәренке кәеф белән каршы ала. Чөнки авыл хуҗалыгында ирешкән уңышларыбыз күңелләргә бәйрәм рухы өсти. Игенчеләр, бар тырышлыкларын, эш тәҗрибәсен бергә туплап, тырышып эшләде, быелгы уңышка ныклы нигез салды. Икмәк – байлыгыбыз, һәр йортның муллык билгесе ул. Ә өстәлләребездә икмәк булса, өйләребез дә бөтен, илебез көчле, имин булыр. Ямьле җәйләребезне күңелле үткәрик, киләчәк көннәргә көч-куәт туплап, басу-кырларыбызда мул уңыш үстерик».