Укучыларның каникуллары хәвеф-хәтәрсез узсын өчен ЮХИДИ хезмәткәрләре юлда йөрү кагыйдәләрен төгәл үтәргә чакыра

ЮХИДИ начальнигы Фирдүс Тимершин әйтеп узганча, бу чорда балалар өчен иң мөһиме -юлларда игътибарлы һәм сак булу. Юл-транспорт һәлакәтенә юлыкмас өчен юл аша җәяүлеләр өчен билгеләнгән урыннардан гына чыгарга, ашыкмаска, дусларыгыз белән үзара һәм телефоннан сөйләшмәскә, музыка тыңлап, игътибарыгызны югалтмаска кирәк. ЮХИДИ хезмәтенең оператив мәгълүматларыннан күренгәнчә, мондый очраклар еш була. Агымдагы елның ике аенда Татарстан Республикасында җәяүле үсмерләр катнашында 28 юл-транспорт һәлакәте күзәтелгән. Аларның һәркайсында балалар зыян күргән. Язгы каникул вакытында кич белән урамга чыкканда киемнәрегезгә яктылыкны кире кайтаручы элементлар беркетергә онытмагыз. Әлеге элементлар ярдәмендә шоферлар сезне вакытында күреп алачак. Бу кагыйдәләрне төгәл үтәү тормышыгызны һәм сәламәтлегегезне сакларга ярдәм итәр.