Кайбыч егетләре армиягә китте

Бүген балалар сәнгать мәктәбе каршындагы мәйданнан районыбызның дүрт егетен Россия Кораллы Көчләре сафларына озаттылар.

Армиягә китүчеләр арасында Олы Кайбычтан Илһам Ярхәмов, Колаңгы станциясеннән Илгиз Гарәфетдинов, Борындыктан Алмаз Шиһапов һәм Мәлкидән Семен Семенов бар иде. Аларны озатырга әти-әниләре, туганнары, дуслары, классташлары да килгән иде.

Район башкарма комитеты җитәкчесе Алексей Макаров егетләргә хәерле юл, намуслы хезмәт итүләрен теләде, әниләренә бүләкләр тапшырды.

Кайбычта хәрби исәпкә алу буенча белгеч Сәвия Зиннурова әйтүенчә, көзге чакырылышта районнан 24 егет Россия Кораллы Көчләре сафларын тулыландырачак.