Олы Урсак авылында яшәүче Гөлсинә Гатиятуллинаның бүген бик бәхетле көне

Гаиләнең иң өлкән, мөхтәрәм кешесе Гөлсинә апага 90 яшь тулды. Шул уңайдан бүген аларда Коръән ашы узды. Гөлсинә Батырша кызын котлап, мул табыннар артына балалары, онык-оныкчыклар, туган-тумачалары җыелды.

Район башлыгы Альберт Рәхмәтуллин исеменнән тәбрикләргә аның ришвәтчелеккә каршы көрәш буенча ярдәмчесе Равия Камалиева да килде. Авыл җирлеге секретаре Алена Петрова да матур теләкләрен җиткерде. Авыл имамы Илфар хәзрәт Сафиуллин юбилярга изге Коръән китабын бүләк итте.

Ак яулыгын бәйләп, табын түрендә балкып утырган Гөлсинә Гатиятуллинага җиткерелгән изге теләкләрнең исәбе юк. Аны яратулары, хөрмәт итүләренә, гади, киң күңелле, кунакчыл булуы өчен әйтелгән рәхмәт сүзләренә чын күңелдән сокланып кайттык.

Сугыш елларына туры килгән бала чагындагы авырлыклар гомерлеккә аның йөрәгенә уелган. Берсе артыннан икенчесе килгән югалтулары да күп булган. Борчу-хәсрәтләрне ирләрчә ныклык белән кичереп, сынмыйча-сыгылмыйча туксан яшенә җиткән. Бүген үзен бик бәхетле хис итә. Улы Айрат, килене Венера тәрбиясендә кадер-хөрмәттә яши.

– Шатлыгым эчемә сыймый. Аллаһ Тәгалагә мең шөкер, дип яшим. Күзләрем күрә, операция ясатмаган, колакларым ишетә, зиһенем әйбәт, ике таяк ярдәмендә булса да, аягымда йөрим, – ди Гөлсинә Гатиятуллина.

– Хәзерге рәхәт тормышны күрергә дә насыйп булды. Мин, тугыз бала табып, шуларның җидесен салкын гүрләргә салган әни. Бүгенге көндә Айратым белән Җәмиләм исән-сау. Аларга зур рәхмәт, карыйлар, тәрбиялиләр. Яхшылыклары үзләренә меңе белән кайтсын! Аллаһ Тәгалә ил-көннәргә тынычлык бирсен. Яу кырындагы якташларыбыз исән-имин гаиләләренә кайтсын иде. Хөкүмәтебезгә рәхмәт, хезмәтебезне тиешенчә бәяләде, пенсияне алып торабыз, табыннарыбыз мул, өебез җылы, су кергән, мең шөкер!

Бу хакта газетабызның алдагы саннарының берсендә