Мөрәле төбәгендәге хезмәт алдынгыларын хөрмәтләделәр. Фоторепортаж

Җәмгыять белән моңа кадәр җитәкчелек иткән Рамил Каюмов узган елда җәмгыятьнең финанс-хуҗалык эшчәнлегенә тулы анализ ясады:

Соңгы елларда районыбыз авыл хуҗалыгы продукциясе җитештерү буенча республика буенча югары күрсәткечләргә ирешә. Районның уңышларында безнең җәмгыятьнең дә өлеше саллы. Үсемлекчелек тармагында, биш ел рәттән корылык килүгә карамастан, югары технологияләр кулланып, чагыштырмача югары уңыш алуга ирештек. Җиде меңгә якын гектар мәйданнан 17420 тонна уңыш алдык. Һәр гектар уртача 25,2шәр центнер уңыш белщн шатландырды. 890 гектар мәйданда игелгән шикәр чөгендереннән 22683 тонна татлы тамыр алуга ирештек. Маллар өчен кышлату чорына җитәрлек терлек азыгы хәзерли алдык.

Терлекчелек тармагы да уңышлы эшләде. 2013 ел белән чагыштырганда, узган елда 192 тоннага артыграк сөт, 124 тоннага артыграк ит җитештерелде. Терлекчелек биналарын ремонтлауга, кардалар, җәйге лагерь төзүгә зур игътибар бирелде.

Район башлыгы Альберт Рәхмәтуллин, хезмәтләрен югары бәяләп, хезмәт алдынгыларына Татарстан Авыл хуҗалыгы һәм азык-төлек министрлыгының, район башлыгының Мактау кәгазьләрен, Рәхмәт хатлары тапшырды. "Ак Барс" холдинг компаниясе генераль директоры киңәшчесе Рафаэль Әбүзәров, генераль директор урынбасары Зөлфия Ваһапова җәмгыять уңганнарын котлап, иң изге теләкләрен җиткерде һәм холдингның медальләрен, күкрәк билгеләрен, Мактау кәгазьләрен тапшырды.

Тантанада шулай ук, җәмгыятьтә төрле елларда эшләп лаеклы ялга чыккан өлкәннәргә бүләкләр тапшырылды. Бәйрәм тантанасы мул итеп әзерләнгән өстәлләр артында, Казан шәһәреннән килгән артистлар чыгышы белән үрелеп барды.