Тарих битләре ачыла: Кайбыч сезне «Кошман укулары»на чакыра!

28 июньдә иртәнге сәгать унда данлыклы Кошман авылының Сабантуй мәйданында беренче тапкыр «Кошман укулары» фәнни-гамәли конференциясе узачак.

Әлеге чара очраклы рәвештә генә Кошман туфрагында оештырылмый. Элек-электән бу төбәк үзенең мәшһүр сөннәтче бабалары белән дан казанган. Алар үзләренең изге сәфәрләрен Россиянең төрле төбәкләрендә генә түгел, хәтта Урта Азия һәм Казахстан якларында да зур осталык белән башкарган. Конференция нәкъ менә шушы кабатланмас сөннәтчелек тарихына һәм традицияләренә багышлана.

Район башлыгы Альберт Рәхмәтуллин бүген «Кошман укулары» узучы Сабантуй мәйданынында оештыру комитеты катнашында җыелыш үткәрде. Очрашуны югары дәрәҗәдә оештыру бурычы куелды.

Бәйрәм киң колачлы булыр дип көтелә: биредә Татарстан Республикасы Диния нәзарәтеннән, Бөтендөнья татар конгрессыннан вәкилләр, күрше районнардан килгән дин әһелләре һәм мәртәбәле кунаклар җыелачак. Анда 150дән артык кеше катнашуы көтелә. 

Бу чарага килүчеләрнең барысын да корбан ашы, пылау, кайнар чәй, коймак белән сыйларга җыеналар. Сәүдә дә оештырыла. "Кошман укулары"нда һәркем катнаша ала, шуңа күрә сез дә килегез! Бу очрашу — һәркем өчен ачык. Килегез, тарихыбызны бергә өйрәник һәм рухи бердәмлекне хис итик! Көтәбез сезне!