Татарстанда физика һәм химия укытучылары өчен премияләр булдырылды

Татарстан Республикасы Министрлар Кабинетының тиешле карарына республика Премьер-министры Алексей Песошин кул куйды.

Премияне алуга Татарстанның дәүләт һәм муниципаль мәктәпләрендә эшләүче физика, химия укытучылары дәгъва итә ала. Конкурс нигезендә сайлап алуны уздыру бурычы ТР Мәгариф һәм фән министрлыгына йөкләнгән.

Өч номинация каралган:

— «Физика — химия укытучысы» — 345 мең сумлык 100 премия;
— «Физика — химия профильле яшь укытучы» — 288 мең сумлык 100 премия;
— «Мәктәптә дә эшләүче физика-химия профильле югары уку йорты укытучысы» — 230 мең сумлык 20 премия.

Түләүне алуның төп шарты конкурста сайлап алуда җиңү булса да, һәр номинация өчен өстәмә таләпләр каралган.

Аерым алганда, тәҗрибәле педагоглар беренче яки югары категориягә һәм биш елдан артык стажга ия булырга тиеш. Чыгарылыш сыйныф укучыларының кимендә 10 проценты профильле фәннәр буенча БДИны 80 һәм аннан да югарырак баллга тапшырырга тиеш. Шулай ук укучыларның олимпиадаларда катнашуы һәм профильле белемнәрне үстерүгә юнәлдерелгән чаралар үткәрелүе дә исәпкә алына.

Яшь укытучылардан биш елга кадәр стаж һәм укучылар өчен елына кимендә ике профильле чара уздыру таләп ителә.

Үз чиратында премиягә дәгъва кылучы мәктәптә эшләүче югары уку йортлары мөгаллимнәренең гыйльми дәрәҗәсе һәм биш елдан артык стажы булырга тиеш. Аларның чыгарылыш укучыларының кимендә 5 проценты бердәм дәүләт имтиханында (80 балл һәм аннан да югарырак) һәм төп дәүләт имтиханында (бик яхшы) югары нәтиҗәләр күрсәтергә тиеш. Шулай ук балаларның олимпиадаларда катнашуы, педагогның елына ике профильле чара үткәрүе сорала.

Кандидатлар экстремистик яисә террорчылык эшчәнлегенә бәйле затлар исемлегенә кертелмәскә, чит ил агенты статусына һәм салымнар буенча бурычларга ия булмаска, шулай ук башка программалар буенча шундый ук түләүләр алмаска тиеш.

Катнашучылардан гариза һәм документлар пакеты, шул исәптән шәхес таныклыгы, диплом, хезмәт стажы турында белешмәләр, портфолио һәм казанышлар турында документлар тапшыру таләп ителә. Гаризаны кәгазь яки, техник мөмкинлекләр булганда, электрон рәвештә бирергә мөмкин.

Чыганак: «Татар-информ»