Хәрби хезмәт – тормыш мәктәбе

Очрашуда шулай ук Бөек Ватан сугышы ветераннары Чыңгыз Ибәтуллин, Гайнетдин Каюмов, авыл җирлекләре башлыклары катнашты. Апас һәм Кайбыч районнары хәрби комиссары, подполковник Илшат Паймурзин әйтеп узганча, язгы чакыры­лыш­та 39 егет илебезнең төрле төбәкләренә үзлә­ре­нең Ватан алдындагы изге бурычларын үтәргә алынган булса, көзге чакырылышта 33 егет солдат бушлаты киячәк. Ул булачак солдатларга Рос­сия Кораллы Көчләре составында хезмәт итүчеләргә куелган таләпләр, армиядә булачак үзгә­реш­ләр хакында сөйлә­де, аларга хәерле юл теләде. Кайбыч муниципаль районы башлыгы Җәүдәт Гаффаров, район башкарма комитеты җитәкчесе Алексей Макаров, Бө­ек Ватан сугышы ветераннары иң изге теләклә­рен юллады. Бу көн Гайнетдин Каюмов өчен истәлекле, чөнки 1944 ел­ның нәкъ 22 октябрендә ул Ватаныбыз чакыруы белән фронтка киткән, җиде ел хезмәт иткәннән соң гына туган якларына әйләнеп кайткан.

- Кайбыч егетләре район оешканнан бирле Рос­сия Хәрби Көчләре саф­ларында Ватан алдындагы бурычларын үти. Хәрби частьлардан ата-аналары исеменә намуслы, чын ир-егетләр тәрбияләгәннәре өчен рәх­мәт хатлары килә. Бер генә егетнең дә район йө­зенә кызыллык китергәне юк. Сез дә алар үрнә­ген­дә үз бурычыгызны намус бе­лән үтәрсез дип ышанам. Шуны онытмагыз: сезне туган якта әти-әниләрегез, дусларыгыз, сөй­гән ярларыгыз көтә, - диде район башлыгы.

Хәрби хезмәт ир-егетләр өчен тормыш мәктәбе ул.

Тантаналы очрашу район үзәк мәдәният йортының "Юлдаш" төркеме, Олы Кайбыч урта гомумбелем бирү мәктәбе укучылары тарафыннан әзерләнгән концерт программасы бе­лән үрелеп барды.