«Кайбыч таңнары» ярыш үткәрде
"Кайбыч таңнары" газетасы призына 17нче тапкыр үткәрелүче традицион ярышның быелгысы Бөек Җиңүнең 67 еллыгына, 2013 елда Казанда узачак Универсиадага багышланды. Шуңа да хатын-кызлар арасында дистанция 2013 метр, ә ир-егетләргә өч чакрым итеп билгеләнде.
Ел саен газетабызның туган көне алдыннан - 12 март тирәсендә узучы ярышны быел район башлыгы Җәүдәт Гаффаров тәкъдиме белән февральнең 27 сендә үткәрергә булдык. Бу хакта әле шимбә көнне генә билгеле булса да, быелгы ярышта катнашучылар да, саф һавада чаңгычыларны карарга килүчеләр дә күп иде. Район мәдәният бүлеге хезмәткәрләре музыка кушып куйды, ә "Кайбыч кооператоры" кафесы кызлары Май чабу бәйрәме уңаеннан болында ук табада чыжлатып коймак пешерде, кайнар чәй, башка камыр ризыклары белән сәүдә итте. Мәктәп укучылары, оешма-предприятиеләр хезмәткәрләре белән бергә чаңгыга басучылар арасында район пенсионерлар берлеге җитәкчесе Ләлә Хәйруллина, лаеклы ялда булган Дамирә Шаһивәлиева, Альберт Ярхәмов, Фәүзия Миңнуллина, Роза Ярхәмова да бар иде. Алардагы күңел күтәренкелеге, яхшы кәеф, йөзләрендәге елмаю, әйтерсең лә, башкаларга да күчкән - бар да уен-көлке белән сөйләшә, шат. Өстәвенә, көне дә чаңгычылар өчен менә дигән: җил дә юк, бураны да алдагы кичтә басылган иде.
Ярыш башлану сәгате җитүгә район яшьләр сәясәте, физкультура һәм спорт бүлеге начальнигы Юрий Михайлов командаларга тезелергә боерык бирде. Чаңгычыларны район газетасы редакторы Фәридә Нигъмәтҗанова сәламләде.
Ярышта Зур Урсак мәктәбеннән ике команда, Мәлки, Федоровское, Кече Мәме, Хуҗа Хәсән, Чүти, Олы Кайбыч мәктәпләре, 135 нче һөнәр училищесы командалары катнашты. Оешмалардан Мәлки, Чүти, Иске Тәрбит авыл җирлекләре, һөнәр училищесы, янгын сүндерү часте, мәдәният бүлеге, башкарма комитетның спорт яратучылары чаңгыга басты. Эстафета ярышы мәктәп укучылары, оешма-предприятиеләр командалары арасында узганлыктан, ике кубок уйнатылды. Укучылардан быел да Зур Урсак мәктәбе командасы беренче урынны яулады. Илһам Кәримов, Язилә Сираева, Алмаз Нуриев командага җиңү китерде. Күчмә кубокны кабат алар алып китте. Икенче-өченче урыннарда - Чүти һәм Иске Тәрбит командалары. Район башкарма комитеты чаңгычылары да оста - эстафетаны беренче булып башлап җибәргән Алексей Горшков көндәшләрен шактый артта калдырды һәм Алексей, Фәннур Зиннуров, Алия Сөнгатова командасы җиңде. Күчмә кубок кабат башкарма комитетта калды. Мәлки, Чүти авыл җирлекләре командалары - икенче-өченче урыннарда. Гаилә эстафетасы да узды. Бу турда Мәлкидән Галкиннар гаиләсе җиңү яулады. Федоровскоедан Григорьевлар, Зур Урсактан Нуриевлар, Кәримовлар икенче-дүртенче урыннарда. Өлкән яшьтәгеләр дә яхшы шуды. Мәктәпләр, оешма-предприятиеләр командаларына бүләкләрне газета редакторы Фәридә Нигъмәтҗанова, ә гаиләләре белән чаңгыга басучыларга, пенсионерларга яшьләр сәясәте, физкультура һәм спорт бүлеге начальнигы Юрий Михайлов тапшырды.
Следите за самым важным и интересным в Telegram-каналеТатмедиа
Нет комментариев