Кайбычта Ходайдан шифалы яңгырлар сорадылар

Район башлыгы Альберт Рәхмәтуллин үз исемен­нән корбан чалдырды.

Ике ай дәвамында коры, кызу һава саклана. Барлык тереклек яңгырга мохтаҗ. Ни сәбәпледер, Ходай бәндәсен корылык белән сыный. Югыйсә, Мөхәммәт пәйгамбәребез үзенең хәдисендә яңгырында вакытында яудырырмын, җилендә вакытында истерермен, дигән. Тормышта кеше Аллага итәгатьлек белдергәндә генә шулай буладыр ул. Районыбыз мөхтәсибе Дамир хәзрәт Гыйниятуллин үз чыгышында шулай диде. Туганнарга, якыннарга тәмле сүзле, җылы мөгалләмәдә булганда гына изге ниятләр тормышка аша. Дамир хәзрәт вәгазендә шулар хакында сөйләде. Авыл аксакаллары белән бергә хатын-кызлар да, балалар да намазга басты. Соңыннан корбан итен­нән пешкән пылаудан авыз иттеләр.

- Яңгыр яумый калмас. Алдагы көнне дә зират читендә җир­ләнгән мөсафир каберлегенә йола кушканча 41 чүмеч су сибеп дога кылдык. Узган елны шушы йоланы башкарганнан соң артыбыздан ук коеп яңгыр яуган иде, быел да шуңа өметләнәбез, - ди­де Гөлсинә Шаһиева.

Лагерьдә ял итүче Илшат, Адель, Ирек тә яңгыр явасына ышана. Ява гына күрсен, бәла-казалар бул­масын!