Көне ел туйдырыр чак җитте

Районыбыз механиза­тор­лары, арбаңны кыштан, чанаңны җәйдән әзер­лә, дигән халык мәкален истә тотып, язгы кыр эшләрендә катнашачак авыл хуҗалыгы машиналарын яңа елга кадәр әзерлек сызыгына куйган иде. Хәзерге вакытта агрофирмаларда, хуҗалыкларда кызу темплар бе­лән тракторларны ремонт­лыйлар. Район авыл хуҗалыгы һәм азык-төлек идарәсе начальнигы Риф­кать Басыйров әйтүенчә, төзекләндерүне 1 ап­рель­гә төгәлләү бурычы куелган. "Яңа юл" хуҗалыгы механизаторлары барлык төр авыл хуҗалыгы техникасын тулысынча ремонтлап бетергән. Агрофирмаларда техника күп, димәк, эш күләме дә шактый. "Гөбенә" дә ремонт таләп ителгән 50 тракторның 15 мартка - 24е, "Алтын кырлар"да 24 тракторның - 9ы, "Заволжье"да 15нең икесе ремонтланган. Шул ук вакытта "Чекмарев" крестьян фермерлык хуҗалыгы, "Бакчачы" җәмгыятендә бу мөһим эшкә керешмә­гәннәр.

Бүгенге көндә авыл хуҗалыгы машиналарын агрегатлаштыру бара. Барлык хуҗалыкларда да бу эшне 25 мартка төгәлләү йөкләнгән. Ремонт эшләренең сыйфатына да зур игътибар бирү сорала. Чөнки үткән еллар тәҗрибәсе күрсәткәнчә, кыр эшләренә чыккач, берничә көннән кайбер агрегатлар сафтан чыга. Агрофирмаларда минераль ашламалар ташу да дәвам итә.