Мәлкинең уңган гаиләләре

Сәгать җидедә башланган бәйрәм кичәсе кичке уннарга кадәр дәвам итсә дә, залдан ник бер кеше чыгып китсен. Мондый җы­лы эчтәлекле кичә­ләр­гә сусаулары әллә каян күренеп то­ра. Шулай булмый ни, мәдәният йортын да үз эченә алган үзәкнең ачылуына әле бер ел да юк бит. Клубсыз авылда мә­дәни учак гүя сүнгән иде. Ә хәзер танылган җырчылар да, район, авыл үзеш­чәннәре дә еш чыгыш ясый биредә.

Авыл җирлеге башлыгы Артем Козловның да, мәдәният хезмәткәрләренең дә, халык вакытында җыелырмы, дип хафаланулары юкка гына булды. Бил­геләнгән вакытта зал тулы иде. Бүген биредә мәхәббәт дигән олы хискә тап төшермичә, озак еллар буена парлап канат кагучыларны, күп бала тәрбияләп үстерүчеләрне, бәби алып кайткан яшь әти-әниләрне бөтен авылдашлары алдында сәхнә түрендә хөр­мәтлә­деләр. Көн саен диярлек күрешеп торсалар да, бер-берсенең яшәеше турында бөтенләй диярлек белмиләр икән бит. Әнә Кыр Буасыннан Влада белән Владимир Лебедевлар, Эльвира белән Павел Ивановлар, Мәл­ки­дән Нина белән Станислав Маланьевлар, Валентина белән Владимир Заказовлар, Мария белән Александр Акрымовларның бергә яши башлауларына 25 ел вакыт узган. Ә Кыр Буасыннан Иулита белән Виталий Блиновлар, Мәлкидән Елизавета белән Марк Галкиннар, Байморзадан Анастасия белән Марк Лазаревлар илле ел буена тормыш сукмагыннан бергә атлый. Бөек Ватан сугышы ветераны Николай Александровның Мариясе бе­лән кавышуына 60 елга якынлаша икән бит инде!

- Гомерләр тиз уза шул. Әле кайчан гына гаилә корган идек, инде аннан соң күпме сулар аккан. Сугыш утын да күрдем, авырлыгын да, әмма югалып калмадык. Өлкән яшь­тә булсак та, бирешергә исәп юк әле. Яраткан шөгылем - умартачылык. Әле бүген монда килер алдыннан гына яңа бал аерттым. Безнең чә­чәкле болыннардан җы­ел­ган хуш исле бал белән чәй эчәргә килегез, - диде Николай агай.

- Туйлар көмешме, ул, эн­җе-мәрҗәнме, бриллиантмы - картаямыни соң йө­рәк! Йөрәкләрне яшь тотар өчен сезнеке кебек кайнар хисләр кирәк, - ди­де алып баручы аларга изге теләкләрен белдереп.

Сәхнәгә күп балалы гаи­лә­ләрне чакырдылар. Мәл­кидән Роза белән Александр Гавриловлар, Зинаида белән Александр Лебедевлар тугызар бала тәрбияләп үс­тер­гән. Авылда яшь гаиләләр дә күп, балалар да туып тора, димәк, килә­чәкләре өметле. Мәлкидә ике баладан соң өченчесен алып кайткан Юрий бе­лән Эльвира Броматкиннар, әле шушы көн­нәрдә генә икенче кызлары туган Аида белән Николай Горшковларны да чакырганнар иде бәйрәм­гә. Ә Иске Буадан Рита һәм Алик Ивановлар "Мә­хәб­бәт һәм тугрылык өчен" медаленә лаек булды. Тантана кунакларына бү­ләк­ләр­не башкарма комитет җи­тәкчесенең социаль мәсьә­ләләр буенча урынбасары Фатыйма Бик­бова, ЗАГС бүлеге начальнигы Рафия Гайнуллина, "Гөбе­нә" директоры Юрий Осипов, авыл җирлеге башлыгы Артем Козлов тапшырды.

Әлеге кичәне алып барган бертуганнар - мәктәп директоры Тамара Иванова белән үзәк директоры Александр Бичарин һәр гаилә тарихын барлаган, эзләнгән. Авыл үзешчәннәре, район мәдәният йорты хезмәткәрләре җыр-биюләре белән бәй­рәмгә ямь өстәде. Мондый кичәне барлык авылларда да үт­кәрсәләр, бик күпләр үр­нәк гаиләләрнең яшәү рәвешен үзлә­ренә өлге итеп алыр иде.