Раштуа бәйрәме уңаеннан Кайбыч район башлыгы Альберт Рәхмәтуллинның котлау сүзләре

«Православие динендәге хөрмәтле райондашлар! Сезне муниципаль район Советы, башкарма комитеты һәм шәхсән үз исемемнән чын күңелдән Раштуа бәйрәме белән тәбрик итәм! Гасырлар узган саен әлеге дулкынландыргыч бәйрәмнең илаһи нуры яктырганнан яктыра бара. Раштуаның бөек тылсымы кеше тормышына тирән мәгънә сала, иман, өмет һәм мәхәббәт чыганагы булып тора. Күпмилләтле Кайбыч соңгы елларда моңарчы күрелмәгән рухи күтәрелеш кичерә, традицион дини нигезләребезгә кайту һаман киңрәк колач ала. Халыклар дуслыгын ныгыту, җәмгыятьтә толерантлыкның кагыйдәгә әверелүе фондында тарихыбыз белән кызыксыну арта, гыйбадәтханәләр ачыла. Башка диннәр кебек православие дә халыкка хезмәт итүдә активлык күрсәтә. Эчкечелек, наркомания кебек ямьсез күренешләрне булдырмау, милләтләр арасында дуслык җепләрен ныгытуга зур тырышлык куя. Раштуа гаиләләрегезгә иминлек китерсен. Шушы изге бәйрәм шатлык-сөенечләр алып килсен, туганнар һәм дусларны бергә җыйсын. Сезгә чын күңелдән ныклы сәламәтлек, ак бәхетләр һәм иминлек телим».