Кайбыч районында гаилә юбилярларын хөрмәтләделәр

Бу иксез-чиксез галәмдә насыйп ярыңны табу – могҗизага тиң күренеш. Меңләгән кеше арасыннан «синеке» дигәнен эзләп ал әле! Ялгышмыйча, соңга калмыйча... Әйе, табу – бер авыр, ә менә шул кешеңне югалтмыйча саклый алу – мең өлеш авыррак! 
...Кайбыч район үзәгендә шимбә көнне 50, 55 һәм 60 ел бергә яшәгән парларны зурладылар.  Алтын, зөбәрҗәт һәм бриллиант туйларын билгеләп үтүче 15 парны чакырганнар иде. Кайбыч муниципаль районы башлыгы Альберт Рәхмәтуллин: «Бу бәйрәмне соңгы елларда даими уздырабыз, кайбер парларны инде икенче тапкыр котлыйбыз», – диде. Гаҗәеп матур, ихлас, җылы бер бәйрәм булды ул! Балачаклары сугыш елларына туры килгән, туганчы ук күпләре ятим калган, «әти» сүзен бер тапкыр да әйтә алмаган буын бит алар. Тормышларында бәйрәмнәр күп булмаган, гап-гади гомер кичергәннәр, ачысын-төчесен күп татыганнар.  
...Зәкия апа һәм Таһирҗан абый Каюмовлар ( Олы Урсак авылы). Сугыш башланганда Таһирҗан абыйга нибары 8 яшь була. Яшьтән эшләп үсә, буй җитә. Кичке уеннарның берсендә, калын толымнарын үреп салган Зәкияне күреп, күңелендә мәхәббәт уты кабына. 1958 елның салкын гыйнварында яшьләр кавышып та куялар. Бер-бер артлы 5 бала дөньяга килә. Зәкия апа – «Ана даны» медале белән бүләкләнгән күп балалы әниләрнең берсе. Икесе дә – гап-гади авыл хуҗалыгы хезмәтчәннәре.  
...Зәйнәп апа һәм Фазылҗан абый Шакировлар (Чүти авылы).  Фазылҗан абый 11 яшендә колхозда эшли башлый – авыр хезмәттә ныгып үсә. 20 ел тракторчы булып эшли, аннан – 33 ел тегермәнче. Армия хезмәтеннән кайтуга,  Зәйнәпкә күзе төшә. 10 көн дигәндә, ул аны әти-әнисе янына килен итеп төшерә. Зәйнәп апа колхозда бозаулар карый, 41 ел стажы бар. 1964 елда яңа йорт өлгертеп чыгалар. Ике егет, бер кыз үстерәләр. Бүгенге көндә уллары Тәлгать тәрбиясендә яшиләр. 4 оныклары, 9 оныкчык­лары бар. 
...Назирә апа һәм Шәфыйк абый Әдиятовлар (Мөрәле). Бергә яши башлаганнарына 55 ел. Бәхетләрен эзләп еракка китеп йөрмәгәннәр – туган авылларында гомер кичергәннәр. Икесе бер класста укыганнар. «Абыемның дус егете иде Шәфыйк, – дип сөйли Назирә апа. – Мин аларга килен булып төшкәндә, өйләре бер яклы гына иде. Гаиләгә унынчы кеше булып бардым. Ике килен идек йортта, тату яшәдек». Гаилә башлыгы гомер буе колхозда балта остасы булган, хәзерге вакытта авыл мәчетенең мәзине. «Сугыш вакытында ук әни белән мәчетне карап тордык», – ди. Назирә апа да гомер буе колхозда эшләгән. Дүрт бала – ике егет, ике кыз үстерәләр, 8 оныклары, 4 оныкчыклары үсә. 
...Нина Андреевна белән Владимир Кузьмич Потаповлар (Олы Подберезье авылы). Икесе дә бер авылдан алар, балачаклары да бергә узган. Нина ханым булачак тормыш иптәшенең сеңлесе белән кечкенәдән үк дус булган. Үзләренә көн дә килеп йөргән кызга күзе төшкән аның. 55 ел бергә гомер кичерүче бу пар өч бала тәрбияләп үстергән. «Шушы еллар эчендә бер-беребез белән сүзсез дә аңлашырга өйрәндек», – ди алар. 
...Шәдия апа һәм Наил абый Шаһидуллиннар (Олы Кайбыч авылы). 1962 елда Караганда шәһәрендә, туганнарында танышалар. Гаилә корып, бергә яши башлыйлар. Ике бала үстерәләр. 1999 елда туган якларына – Кайбыч районына кайтып төпләнәләр. «Кавышуга язылышмадык, – дип сөйли Шәдия апа. – Бабагыз: «Әллә торып китә алабыз, әллә юк, яшәп карыйк әле башта», – диде. Яшәп карап ятабыз менә, илле алтынчы ел китте инде...» 
...Гөлфирә апа һәм Газизҗан абый Шакировлар (Олы Кайбыч авылы). «Мәхәббәт тарихыбызны искә төшерсәм, бөтен кеше көләрме икән, – дип сөйли Гөлфирә апа. – Сабантуй көне иде. Таган яныннан, кичке уеннан кайтам. Яныма бер машина килеп туктады. Кай арада төштеләр, кай арада мине күтәреп машинага салдылар – сизми дә калдым... Урлап алып кайтты шул... Кеше көлдермим дип яши торгач, 55 елда тулды менә.  Тормышның агын да, карасын да күрдек. 30 ел каенана белән бергә яшәдек. Ун ел фермада эшләдем, аннары 30 ел пешекче булдым. Хәзер инде икебез дә сиксәнне уздык. Сабырлык кирәк бөтен кешегә. Сабыр итсәң, тормыш бара ул...» Гөлфирә апа белән Газизҗан абый ике кыз үстергәннәр, 4 оныклары, 1 оныкчыклары бар. Алар бүгенге тормыштан икесе дә бик канәгать. «Бәхет өчен күп кирәкми», – диләр. 
...Хәния апа һәм Гарәфетдин абый Хөснетдиновалар (Чүти авылы). Гарәф абый 12 яшендә фермага эшкә урнаша. Соңыннан тракторчы ярдәмчесе була, бригадта атлар карый.  Армиядән кайткач, тракторда эшли башлый. 1999 елда «Татарстанның атказанган механизаторы» исеменә лаек була. Хәния апа бозаулар карый. Бер ул, өч кыз үстергәннәр. Барысына да югары белем биргәннәр, балалары һәммәсе дә укытучылар. Бүгенге көндә уллары Рәис, киленнәре Фаянур тәрбиясендә яшәп яталар. 
...Фәния һидият кызы белән Анатолий Ильич Егоровлар (Иске Тәрбит авылы). 42 ел буена гел бер урында гына – балалар бакчасы мөдире булып эшләгән Фәния ханым һәрбер теләген шигырь юллары белән әйтеп бирде, җырлады да. Чын күңелдән сокланып тыңладык аны. Илле елдан артык бергә яшәүче Егоровларның бәхетле яшәү сере гади – нинди генә сынауларда да бирешмәскә, бер-береңә зур таяныч булырга!
...Вәсилә апа һәм Рафил абый Тимергалиевлар (Кошман авылы). 50 ел элек кавышканнар. Үзләре әйтмешли, «шуннан бирле тату гына яшәп яталар». Икесе дә озак еллар колхозда эшләп, лаеклы ялга чыкканнар. Ике егет, бер кыз үстергәннәр, 4 оныклары, 1 онык­чылары бар. Балалары төп нигезне сагынып кайтып йөриләр.  
Мәүлиха апа һәм Равил абый Айзатуллиннар (Олы Кайбыч авылы). Арча кызы Мәүлиха Кайбычка эшкә юллама белән килә.  Һәм... язмышын да шунда таба. Равил абый белән алар ике кыз үстерәләр, икесенә дә яхшы тәрбия, югары белем бирәләр. Мәүлиха апа гомер буе мәктәптә балалар укыта, Равил абый орлыкчылык инспекциясендә хезмәт итә. Мәүлиха апаны районда үзешчән шагыйрә буларак та беләләр.  
...Фәридә апа һәм Рәфыйк абый Гыйльфановлар (Олы Кайбыч авылы). Шофер булып эшләүче Рәфыйк китапханәче кыз Фәридәгә бер күрүдә гашыйк була. Әлбәттә, китапханәдә танышалар алар! Шуннан бирле бергә. Бер кыз һәм ике егет тәрбияләп, аларны олы тормыш юлына чыгарганнар. Бәхетле картлык кичерәләр. 
...Римма Петровна белән Николай Петрович Зайцевлар (Колаңгы станциясе). Чувашиянең Алатырь шәһәрендәге тимер юлчылар әзерләү техникумында бергә укыйлар алар. Кыз бераздан читтән торып укый башлый, провод­ница була. Ә дипломлы егетне Яшел Үзән районындагы «Гөбенә» станциясенә бригадир итеп эшкә җибәрәләр. Техникумда укыганда кабынган мәхәббәт үзенекен итә: алар өйләнешләр һәм Колаңгыда яши башлыйлар. Әлеге тантанага кайткан олы кызлары Наталья әти-әниләре турында җылы сүзләр әйтте. 
 Кичәне алып баручы кызлар, аларның барысына да диярлек берүк сорауны бирде: «Гаиләнең ныклыгы, бергә шулай озак яши алуның сере нидә?» – дип сорадылар. Җаваплар барысы да бик гади иде:
– Нәрсә дип әйтим икән, наным? (Безнең якта үзеңнән кечеләргә шулай «наным» дип дәшәләр. – Г. С.) Төрле чаклар була... 60 ел яшибез менә. Бер-беребезгә булышабыз. 
– Абыегыз аракы эчмәде, тәмәке тартмады, эш яратты. Үзара тату булдык...
– Бер-беребезне хөрмәт иттек, бер-беребезгә тугры булдык. Бөтен эшне киңәшләшеп эшләдек...
– Бер-беребезне аңлап, кадерне белеп яшәдек... Картлыгыбыз шуңа тыныч...  
Безнең әни (бәйрәмгә чакырылган парлар арасында илле ел бергә яшәгән, дүрт кыз тәрбияләп үстергән әти-әнием Мөнширә белән Мөдәрис Сафиуллиннар да бар иде. Алар Кече Кайбыч авылында яши): «Каенанам белән каенатамның хәер-фатыйхасын алып калдык. Икесе дә урын өстендә ятып авырдылар. Соңгы сулышта: «Тигезлек белән яшәгез, балаларыгызның рәхәтен күрегез», – диделәр. Аларның теләге чынга ашты», – диде. 

Бер-береңне саклауның сере шулай да нидә соң? 
Мәхәббәтнең гомере – өч көнлек, аннары, Туфан абый әйтмеш­ли, «өстенә яккан балын ялап бетерәсең дә, гомер буе кара ипи ашыйсың». Менә шунда  бу кичәдә еш яңгыраган «сабырлык, түземлелек, бер-береңне хөрмәт итү» кебек сыйфатлар кирәк була да инде...  Барысы да күптән билгеле, барыбызга да мәгълүм хакыйкатьләр. Чынлап торып уйлап карасаң, сер юк та. Әмма нигәдер аерылышулар гына адым саен... 
Гаилә, мәхәббәт һәм тугрылык көненең төп символы – ромашка чәчәге. «Яратамы, яратмыймы?» дип аның таҗларын өзгәндә, иң соңгысы һәрвакыт «ярата» булсын! Бүген дә, иртәгә дә, илле елдан соң да... 
Парлыларга тигез гомер телим, ялгызларга – тиң парларын очратуны! 

Гөлнур Сафиуллина,
Кайбыч – Казан