Безне Урсакта да яраталар

Зур Урсак почта бүлекчәсе начальнигы Гөлназ Ну­риева сүзләренә караганда, хәзерге вакытта биредә "Кайбыч таңнары"н 128, рус телендәге басмасын 28 язылучы өе­нә алдыра икән. Ни шатлык, бүлекчәгә килеп кергәндә почта хезмәткәрләренең нәкъ менә безнең газетаның яңа гына кулларына килеп иреш­кән чираттагы саны белән танышып утырулары иде. "Газет-журналлар килүгә иң беренче эш итеп район газетасын укып алабыз, андагы яңалыклар белән танышабыз. Авылдашларыбыз да көтеп ала, Кайбычның җанлы тормышын яктыртучы бас­ма аларның да якын дусты", - диләр алар. Зур Урсак авылына хезмәт күрсәтүче Алия Мөхәм­мәтҗанова, Имәле Башында почта таратучы Зөлфия Галиева һәм ин­де 12 ел Чүкри Алан поч­тальоны булып эшләүче Роза апа Галиева белән хезмәтләренең җаваплылардан булуы хакында да сөйләшеп алдык. Җил­ме-яңгырмы, буранмы-салкынмы - газета-журналлар, пенсия-субсидияләр адресатына вакытында барып җитсен өчен тырыша алар. 2013 ел­ның беренче яртыеллыгына матбугатка яздыру кампаниясен дә башлап җибәргәннәр. Эшне тиз тотарга уйлыйлар: алдан куелган план буенча декабрьгә кадәр газет-журналларга яздыруны тә­мамларга кирәк. Әле хә­зер дә авылларда почта бүлекчәсе тормыш кайнаган урыннарның берсе булып кала бирә: сәүдә ноктасы да ул, матбугат учагы да, хат-телеграмма җибәрү, акча алу урыны да, торак-коммуналь хез­мәтләргә түләргә дә бирегә киләләр. План буенча 2013 елның беренче яртыеллыгына районда 12 мең данә газета-журналга яздыру күздә тотыла. Район почта элемтәсе бүлегеннән алынган мәгъ­лүматларга караганда, хәзерге вакытта планның 30 проценты үтәлгән. Гадәттәгечә, яздыруның "урак чоры" ноябрь ахыры-декабрьгә туры килә­чәк.