Симәкидә яшәүче Тәскирә Латыйпова Ленинград шәһәрен камалыштан азат итүнең 70 еллыгына багышланган тантанада катнашты
29 гыйнварда Казанда 1941-1945 еллардагы Бөек Ватан сугышы вакытында Ленинград шәһәрен немец-фашист гаскәрләре камалышыннан тулысынча азат итүнең 70 еллыгына багышланган тантана узды.
- Бу көнне Татарстанның төрле шәһәр-районнарыннан килгән 52 ветеранны Татарстан Хөкүмәте исеменнән хөрмәтләделәр, - диде әлеге тантанага безнең район ветеранын озата барган социаль яклау бүлеге начальнигы Чулпан Камалиева. - Хезмәт, халыкны эш белән тәэмин итү һәм социаль яклау бүлеге министры Айрат Шәфигуллин әйтеп узганча, Ленинград камалышында калучылар - шул авыр елларның коточкыч сынауларын үз җилкәләрендә күтәргән кешеләр.
Симәки авылында яшәүче Тәскирә Латыйпова тантанадан алган фикерләрен безгә дә җиткерде:
- Ул елларның авырлыкларын мәңге онытасыбыз юк. Бу очрашуда Нева буендагы камалышта калган бик күп яшьтәшләрем белән аралаштым. Безгә Ленинградны фашист тоткынлыгыннан тулысынча азат итүнең 70 еллыгы уңаеннан Санкт-Петербург шәһәренең истәлекле бүләген дә тапшырдылар. Очрашуны оештыручыларга рәхмәтем чиксез, - диде ул.
Олы Кайбычта яшәүче Хәдия Вәлиева, Рәфыйк Хәйруллин да Ленинград камалышын үз күзләре белән күргән. Чүтидән Асия Бәширова - фашист лагерьларының балигъ булмаган тоткыны. Бу ветераннарга шушы көннәрдә район башлыгы Альберт Рәхмәтуллин Ленинградны немецлардан азат итүнең 70 еллыгы уңаеннан Хөкүмәт тарафыннан әзерләнгән махсус бүләкләрне тапшырачак.
Следите за самым важным и интересным в Telegram-каналеТатмедиа
Нет комментариев