Кече Мәме авылында мәдәният учагы төзекләндерелә

Авыл җирлеге башлыгы Тамара Алексеева әйтү­ен­чә, биредә ремонт эшләре агымдагы елның гыйнварында башланган. Капиталь ремонт өчен ак­ча республика бюджетыннан бүлеп бирелгән. 1975 елда төзелгән бина озак еллар буена ремонт күр­мәгән. Хәзер биредә Әл­мәт шәһәренең "Шә­риф" җаваплылыгы чикле җәм­гыяте бригадасы эш­ли. Ан­да Кече Мәменең үз егетләре дә - Вениамин Киселев, Валерий Федотов, Валерий Фомин да бар. Бригаданы Василий Малахаев җитәкли. Төзү­челәр мәдәният йортының түбәсен тулысынча алыштырып, профнастил белән япкан. Иске идән­нәрен сүткәннәр, тү­шәм такталарын алыштыралар. Идәнгә җитәрлек такта да кайтарып куйганнар.

- Гыйнвар, февральдә салкын көннәрдә эшли алмадык. Төзелеш материаллары белән бераз өзеклекләр булуы эшебезне тоткарлады, - диде Василий Малахаев.

Төзүчеләр мәдәният йортының стеналарын эчтән гипслы картон, тышкы яктан металл сайдинг бе­лән тышлаячак, эленмә тү­шәм ясаячаклар. Тамара Алексеева сүзләренә караганда, биредә Мөрә­ле­дәге кебек тамашачылар залын бүлеп алып, авыл җирлегенә бүлмә­ләр булдырылачак. Шул ук бинада урнашкан фельдшер-акушерлык пункты узган ел ремонтланган.

Без килгән көнне биредә Казан шәһәренең "Дакар- пласт" төзелеш фирмасы эшчеләре мәдәният йортының тәрәзәләрен пластикка алмаштыру эшенә керешкән иде. Төзүчеләр аларга эш күләмен киметкән, кайбер тәрәзә­ләр­не кирпеч белән бөтен­ләй томалап куйганнар. Төзүчеләр мә­дәният учагын төзекләндерүне Сабан туена кадәр төгәл­ләргә вәгъдә итә.

Кече Мәме авылы мәдә­ният йортында төрле чаралар гел үткәрелеп килде. Аларның данлыклы "Палан" фольклор ансамбле бар, биредә армиягә китүче егетләрне озату кичәләре, истәлекле даталарга багышланган концертлар, әдәби-музыкаль кичәләр, китапханәдә төрле чаралар да даими үт­кә­релде. Ремонт эшлә­ре төгәлләнгәч, авылның мәдәни тормышы тагын да җанланыр әле.