Колаңгыда Качману көнендә Бәрледә су коену беренче тапкыр узачак

Качмануда гадәт буенча елгада, бәкедә коенып, тәннәрен аруландыралар. Әлеге көнне бәйрәм иткәндә төрле бәла-казаларга юл куймау - иң төп бурычларның берсе. Гадәттән тыш хәлләрне кисәтү һәм бетерү, янгын куркынычсызлыгын тәэмин итү буенча республика комиссиясенең чираттан тыш утырышында да төп басым шуңа ясалды. Турминский чиркәвеннән Николай атакай әйтеп узганча, коену буенча төп чаралар гадәттәгечә Турминскийда уза һәм анда район авылларыннан гына түгел, шәһәрләрдән кунакка кайтучылар да килә. Николай атакай Турминскийда, Колаңгыда, Кече Мәмедә бәкедәге суны изгеләндерергә бара. Колаңгы авыл җирлеге башлыгы Фидаил Нигъмәтҗанов әйтеп узганча, Колаңгыда Качману көнендә Бәрледә су коену әле беренче тапкыр гына үткәрелә. Ул 19 гыйнварда иртәнге сәгать уннан көндезге сәгать уникегә кадәр дәвам итәчәк. Кече Мәмедә бәкедә коену ел саен уза. Суга чуму урыннарында полиция, фельдшер, гадәттән тыш хәлләрне кисәтү хезмәткәрләре кизү тора, анда палаткалар да куела.