Кайбычта балалар юл хәрәкәте кагыйдәләрен белә. Бәйге шуны күрсәтте

Район мәгариф бүлеге, Россия Эчке эшләр министрлыгының "Апас" муниципальара бүлегенең Кайбыч бүлекчәсе ЮХИДИе хезмәте белән берлектә үткәрелгән әлеге бәйгедә16 мәктәп командасы катнашты.

Бәйгедә Ильмир Шәмсетдинов, Альмир Гарәфиев, Фирүзә Хуҗина, Айзилә Абдрахманованы берләштергән Борындык төп мәктәбе командасы җиңү яулады. Олы Кайбыч, Мәлки мәктәпләре командалары икенче- өченче урыннарда.

Шәхси беренчелектә Федоровское мәктәбеннән Полина Григорьевага тиңнәр булмады. Икенче- өченче урыннарны Зур Урсактан Исламия Кәримова, Мәлкидән Елена Воробьева бүлеште.

Малайлар арасында Борындык мәктәбеннән Альмир Гарәфиев беренче, Ильмир Шәмсетдинов икенче урынны яулады. Мәлкидән Олег Сергеевка өченче урын бирелде. Җиңүче командаларга, шәхси беренчелектә җиңүчеләргә Мактау кәгазьләре тапшырылды.

Бәйгедә җиңү яулаган Борындык төп мәктәбе командасы 21-24 майда Яр Чаллы шәһәрендә үтәчәк республика бәйгесендә катнашачак.

(Бу хакта тулырак газетаның киләсе саннарыннан укырсыз).