Министр уңай бәяләде

16 сентябрьдә районга эшлекле визит белән кил­гән ТР Премьер-минист­ры урын­басары - авыл хуҗалыгы һәм азык-тө­лек министры Марат Әхмәтов татлы тамыр алу барышы бе­лән танышты. "Заволжье" җәмгыятенең Бортас авылы басуында аны муниципаль район башлыгы Җәү­дәт Гаффаров, "Ак Барс" холдинг кампаниясе генераль директорының авыл хуҗалыгы мәсьәлә­ләре буенча урынбасары Николай Титов, район авыл хуҗалыгы һәм азык-төлек ида­рә­се начальнигы Рифкать Басыйров, "Заволжье" җәм­гыяте директоры Айрат Фатыйхов, Буа муниципаль районы башлыгы Ра­фаэль Әбүзәров каршы алды.

Кайбычлылар үстергән ши­кәр чөгендеренә министр югары бәя бирде. Ул бу кырдан күпме уңыш алынуы, югалтуларга юл ку­елмавы, эш оештырылышы, техниканың ничек эшләве белән кызыксынды. Айрат Шәһитович әй­теп узганча, бу кырдан һәр гектардан уртача 320 шәр центнер татлы тамыр алына. Эш тәүлек әй­ләнәсенә оештырылган. Ләкин Буа шикәр заводының эш вакыты чикле, шуңа күрә басудан чимал билгеле сә­гатьләрдә генә озатыла.

Николай Титов сүзләренә караганда, холдинг карамагында 18 "Ropa" чөгендер алу комбайны бар, алар Иделаръягы район­нарына алтышар итеп бү­ленгән. Комбайннар ватылса, ремонт бригадасы аларны тиз арада саф­ка бастыру өчен тырыша.

Соңгы көннәрдә явып узган яңгырлар чөгендерчеләр эшендә өстәмә тоткарлыклар тудырды. Көз яңгырларга бай инде ул. Шуңа да аяз көннең һәр сәгатен нәтиҗәле файдаланырга кирәклеге кат-кат әйтелде. Шушы комбайннар "Гө­бенә", "Алтын кырлар" җәмгыятьләрендә дә шикәр чөгендере алачак.

Министр шикәр чөгендере комбайнчыларын "Ropa" комбайнында эшли белү­че җирле механизаторлар белән алыштырып, эшне тәүлек әйләнәсендә алып барырга тәкъдим итте.Чөнки комбайнчылар тимер түгел, аларга да ял кирәк. Кайбычтан Марат Әхмәтов вертолетта Буа районыда юнәлде.