Кайбыч таңнары
  • Рус Тат
  • Авылым укытучысы

    Кеше гомере бигрәк тиз уза икән ул. Минем дә Бәрлебашы мәктәбендә егерме елдан артык гомерем узган. Мондый язмышлы булуыма мин чиксез шатланам һәм рәхмәтле. Ник дисәгез, язмыш мине акыллы, сабыр, тыйнак, ягымлы, ярдәмчел кешеләр белән очраштырды, мин тату коллективта эшлим. Мәктәбебез директорының уку-укыту буенча урынбасары Талия Илтөзәр кызы Гарифуллинага аерым...

    Язмыш аны чит җирләрдә сынап-сынап караса да, Казан дәүләт педагогия институтын тәмамлаган математика укытучысын туган мәктәбенә кире кайтара. Үзенә белем биргән укытучылар янәшәсендә эшләү җаваплылык өсти аңа. Артык тыйнак Талия апа бу көннәрне зур горурлану белән искә ала. Шушы фәнгә мәхәббәт тәрбияләгән укытучысы Егоров Владимир Васильевичтан күп нәрсәләргә өйрәнә, остазлары белән бергә эшләвенә куана. Утыз еллык тәҗрибәсе булган Талия Илтөзәровна үзе хәзер безнең өчен үрнәк, өйрәтүче һәм акыллы җитәкче дә.

    Мәктәбебезгә төрле авыллардан килгән балаларның да иң беренче хәл­ләрен ул белә, барысының да күңеленә үтеп керә, аңлый, киңәшен бирә. Кемнедер аз гына кыерсытсалар да, чын йөрәктән ярдәмгә ашыга, дө­рес юл күрсәтә. Дәресләрендә дә тавышын кү­тәреп сөйләгәнен, кемгәдер кычкырганын ишет­мәссең, я булмаса килеп чыккан авыр хәлдән чыгу юлын таба алмыйча аптырап калганын күрмәс­сең аның. Шуңа күрә бар укучылар да аны ярата, хөрмәт итә, мәктәпне тә­мамлагач та элемтәләре югалмый. Укытучылар бүл­мәсендә, сүз артыннан сүз китеп, сөйләшеп утырган чакларда да ул гел акыллы киңәшләрен бирер, кыен чакларда да юатыр сүзләр таба, һәр­бе­ребезгә ярдәм итәргә ашыга.

    Күркәм сыйфатлар аңа әти-әнисеннән күчкәндер, мөгаен. Илтөзәр абый бе­лән Гөлсинә апаның олы кызлары булып дө­ньяга килгән Талия үзен­нән соң туган энекәшләрен тәрбияләшкән, әти-әнисенең уң кулы булган шул. Дөрес тәрбия биргәннәре өчен рәхмәтле булуын ул беркемнән дә яшерми, безгә - хезмәттәшләренә дә үрнәк итеп куя.

    Менә шундый тәрбия алып үскән кызны күрше авыл егете бик тиз күреп ала... Талия апаның Әмир абый Гарифуллин белән тормыш корып яшәүләренә дә инде чирек гасыр үткән. Эш сөючән бу гаи­лә авылдашлары өчен дә үрнәк.

    Тыйнаклык өлгесе булган Талия Илтөзәр кызы бу көннәрдә гомеренең уртасында басып тора. Тормыш авырлыкларына бер генә дә бирешмичә, кыенлыкларны читкә куа-куа, үзе сайлаган юлдан горур, матур итеп алга атлый.

    Нравится
    Поделиться:
    Реклама
    Комментарии (0)
    Осталось символов: