Кайбыч таңнары
  • Рус Тат
  • Булса иде күбрәк шундый очрашулар...

    Дәресләр бетүен көн саен зарыгып көтәбез, чөнки аннары күңелле сәгатьләр - түгәрәкләр башлана. Безнең мәктәптә сәнгатькә багышланган "Яшь бөреләр" һәм "Яшь талантлар" түгәрәкләре эшли. Яшь хәбәрчеләрне берләштергән "Яшь бөреләр" түгәрәге оешуга быел 12 ел.

    Вакыт узганы, еллар үткәне сизелми дә. Әлеге түгәрәккә икенче класста йөри башлаган идем, хәзер инде тугызынчыга җиткәнмен. Яраткан мәктәбем белән хушлашыр вакытларым да килеп җитә. Без, каләм тибрәтүче укучылар, бик күп бәйгеләрдә катнаштык, җиңүләр яуладык. Атнага ике тапкыр остазыбыз Исламия апа Мусина җитәкчелегендә шөгыльләнәбез. Мә­каль­ләр, шигырьләр язу белән генә чикләнмибез - телебезне баету өчен Исламия апаның китап-журналлары, тәмле сүзләре, яхшы ки­ңәш­ләре җитәрлек. Әйе, менә шулай гәҗит-журналлар алып, кызыклы мәкаләләр, хикәяләр дә укыйбыз. Яхшы җитәкче булмаса, түгәрәк тә алай гөрләп эшләмәс иде. Килешәсезме? Җитәкчебезнең тирән белемле булуына сокланам мин! Вакыйгаларны үз тормышындагы хәлләргә нигезләнеп сөйләргә ярата, ә без - тыңларга.

    Түгәрәк утырышлары бер-берсенә бөтенләй охшамаган, гел үзенчәлекле үтә. Күптән түгел, мәсәлән, репортажлар язып килдек. Үзебезне булачак журналистлар кебек хис иттек. Ә менә февраль ахырында чын журналистны - "Кайбыч таңнары"ыннан килгән Луиза апа Сөнгатуллинаны күрү - безнең өчен бәйрәм иде. Беренчедән, Луиза апага миннән: "Сез ни өчен журналист һөнәрен сайладыгыз?", Әдилә Ибәтуллинадан: "Журналист булу авырмы?", Фирүзә Мусинадан: "Сез шигырьләр язасызмы?"дигән сораулар бирелде. Луиза апа барысына да төгәллек белән җавап бирде: "Журналист юлын сайлауга балачактан ук газета-журналларга мәкаләләр язуым этәргеч бирде. Һәрбер һө­нәрнең үз кыенлыклары бар. Ләкин, үз эшеңне бирелеп, яратып, белеп башкарсаң, бернинди кыенлыгы да юк. Журналистикага мәкаләләр язучылар кирәк, шигърият - башка". Луиза апа безнең иҗат белән дә кызыксынды: "Укучыларыбыз хатларын көтеп алабыз, ешрак языгыз,"- дигән теләген белдерде.

    Журналистикага кереп киткәч, без республикабыздагы язучыларга да тукталдык. Кайбыч районында Шәүкәт Галиев, Роберт Миннуллин кебек шәхесләр белән элегрәк узган очрашулар бездә җылы тәэсирләр калдырган иде. Бу очрашу да күңелебездә озак сакланыр әле.Теләгебез бер генә: мондый очрашулар ешрак булсын иде.

    Нравится
    Поделиться:
    Реклама
    Комментарии (0)
    Осталось символов: