Кече Кайбычта – Уңыш бәйрәме
Ел буена җитәрлек байлык-муллык алып килүче көзне олыламый мөмкин түгел. Әлегә кадәр бу күркәм гадәт мәктәп балалары арасында гына булса, быелгы елны көзне олылаучы Уңыш бәйрәме Кече Кайбыч авылы клубында да оештырылды.
Авыл китапханәчесе Рузалия Гыйматдинова бәйрәмгә кунаклар чакырды, декрет ялында булса да, алты балам бар, дип тормады, Гөлнара Абдуллина да бәйрәмне оештыруда тырышып йөрде.
Вакыты җиткәч, авыл клубына иңнәренә ап-ак яулыкларын япкан, кулларына күчтәнәчләр тоткан апалар, хуҗабикәләр килде. Рузалия белән Гөлнара аларны матур итеп өстәл әзерләп каршы алды. Авыл апалары өстәлгә көз нигъмәтләреннән үзләре пешереп алып килгән ризыкларны да куйды. Гөлфирә апа Әхмәтҗанова пешергән бәлеш өстәлнең күрке иде, билгеле. Сылу апа Гайнулллинаның салаты да өстәлгә ямь кертте. Ә Мансур абый Гомәров безне үзе үстергән карбыз-кавын белән сыйлады. Алар тормыш иптәше Гөлия апа белән бергәләп килгән иде. Равилә, Гөлнур, Фәнүзә апаларның күчтәнәчләре дә барсының да күңеленә хуш килде. Өстәл тагын да матурланып, тулыланып китте.
Килгән кунаклар өстәл янында гына утырмады, Рузалия Гыйматдинова аларны уйнатты да, табышмакларга җаваплар да таптырды. Апаларның барысы да уеннарда катнашты. Яшьләргә хас җитезлек белән "бәрәңге утыртып, бәрәңге алдылар", бәрәңге әрчүдә җитезлектә дә ярыштылар.
Барлык уңган хуҗабикәләргә тәмле ризыклар пешереп килгән өчен бүләкләр тапшырылды. Сыйланып алганнан соң, бергәләшеп яшьлектәге җырлларын искә төшереп, баянга җырлап утырдылар. Апалар гына түгел, Мансур абый да җырларга теләп кушылды, хәтта үзе генә дә матур итеп җырлап бирде. Тәскирә апа Миңнуллинаның җырлавы да беркемне дә битараф калдырмады. Олыгая барса да, яшьлек дәртен югалтмаган, татар халык җырларын оста итеп башкаручы апабыз ул безнең. Гөлнур Мотыйгуллина да матур итеп җырлап, кунакларның күңелен күрде.
Ахырдан кунаклар бәйрәмне оештыручы Рузалия Гыйматдиновага һәм Гөлнара Абдуллинага зур рәхмәтләрен әйтеп, өйләренә таралыштылар. Әйе, бәйрәм күңелле узды. Авыл апаларына матур кичә булды. Безгә күңелле ял сәгатьләре бүләк итүчеләргә зур рәхмәтебезне белдерәбез.
