Яңа очрашу – яңа танышулар

"Идел"дә безне сменаның оештыру комитеты әгъзалары, "Кадрлар резервы"ндагы яшьтәшләребез каршы алды. Урнашып беткәч, барыбызны да урамга чакырдылар. Менә шунда инде бар кызыгы да башланып китте. Безне күңелле сюрприз көтә иде: "Кадрлар резервы"ндагы дусларыбыз "Аркан курслары" үткәрде. Нинди генә биремнәр үтәмәдек без! Кемнәрдер тау кәҗәләре кебек сикерде, кемдер "очты", кемдер үзен батыр, хәтта клоун итеп хис итте. Һәр командага да җырларга, ламбада биергә, приседание ясарга, паровоз булып йөрергә туры килде. Биремнәр башта авыр булып тоелды, әмма аларны уңышлы гына үтеп чыктык. Уенның иң мөһим шарты - сөйләшмәү иде. Әл­бәттә, һаман сөйләшмичә тору безнең өчен авыр булды, чөнки хис-кичерешләребез ташып тора. Бу курсларда бер-беребезне тыңларга, үзебезне дөрес тотарга, командада эшләргә өйрәндек. "Аркан курслары"ның төп максаты да командалар бер­дәм­леге иде. Үзебезне республиканың иң креатив балалары икәнлеген расладык.

Алдагы көннәр дә бик кызыклы һәм күңелле үтте. Өч көн дәвамында төрле проблемалар тикшердек, проектлар яздык, эксперт­лар белән киңәштек.

Казанга, "Зилант" спорт комплексына барабыз дигәч, бик шатландык. Автобусларга бүленеп, тү­земсезлек белән тизрәк тимераякта йөрүебезне күз алдына китереп утырдык. Бу спорт комплексына беренче килүем иде. Бераздан бозда рәхәт­ләнеп шуып йөри идек инде. Безнең арада тимераякка беренче тапкыр басучылар да булды. Миңа калса, шундый чаралар безне берләштерүдә, бер-беребезгә сирәк, әмма безнең өчен бик мөһим, ягымлы сүзләр әйтергә мөмкинчелек бирде.

Шуның белән безнең көзге сменабыз ябылды. Хәзер ноябрьдә узачак яшь гражданнар форумына әзер­ләнәбез. Алда чынга ашырырга тиешле яңа проектлар һәм тәкъдимнәр, күпсанлы эшләр һәм яңа очрашулар көтә.